અમદાવાદ: AMTS ડ્રાઈવર મોહસીન ખાને ‘મોહિત પટેલ’ બની યુવતીને પ્રેમજાળમાં ફસાવી, દુષ્કર્મની ફરિયાદ બાદ ધરપકડ | Ahmedabad assault case AMTS driver Mohsin Khan arrested Love Jihad
Love Jihad in Ahmedabad: અમદાવાદમાં ઓળખ છુપાવીને યુવતીને પ્રેમજાળમાં ફસાવવાનો એક ચોંકાવનારો કિસ્સો સામે આવ્યો છે. AMTSમાં ડ્રાઈવર તરીકે ફરજ બજાવતા વિધર્મી યુવક મોહસીન ખાને મોહિત પટેલ નામનું હિન્દુ નામ ધારણ કરી અને તે નામનું નકલી આધાર કાર્ડ બનાવીને એક યુવતીને પોતાની પ્રેમજાળમાં ફસાવી હતી. પોતાની જાતને કુંવારો ગણાવનાર આ આરોપી અગાઉથી જ પરિણીત છે અને તેને ત્રણ બાળકો પણ છે. તે નકલી આધાર કાર્ડનો ઉપયોગ કરીને યુવતી સાથે અલગ-અલગ હોટલોમાં રોકાતો હતો અને તેની સાથે શારીરિક સંબંધો બાંધ્યા હતા. જોકે, યુવતીને શંકા જતાં તેણે આરોપીનો ફોન ચેક કર્યો હતો, જેમાં તેની બહેનનો નંબર મળતા ઘટસ્ફોટ થયો હતો. પોતાનું સત્ય સામે આવતા આરોપીએ ભોગ બનનાર યુવતીને ધમકીઓ આપવાનું શરૂ કર્યું હતું. આ મામલે યુવતીએ પોલીસ મથકે ફરિયાદ નોંધાવતા પોલીસે તાત્કાલિક કાર્યવાહી કરીને નકલી આધાર કાર્ડ કબજે કર્યું છે અને તેની ધરપકડ કરી વધુ કાર્યવાહી હાથ ધરી છે.
પોલીસે જણાવ્યું કે, એક મહિલાએ ફરિયાદ નોંધાવી છે કે જ્યારે તે એએમટીએસ બસમાં અપડાઉન કરતી હતી ત્યારે એક ડ્રાઇવરના સંપર્કમાં આવી હતી. આ ડ્રાઇવરે પોતાનું નામ મોહિત પટેલ જણાવી અને પોતે અપરણિત હોવાનું કહીને મહિલા સાથે ફોન અને ઇન્સ્ટાગ્રામ પર વાતચીત શરૂ કરી હતી. લગ્નની લાલચ આપીને તે મહિલાને અલગ-અલગ હોટલોમાં લઈ ગયો હતો અને શારીરિક સંબંધો બાંધ્યા હતા, જ્યાં પણ તે મોહિત પટેલ નામનું જ આધાર કાર્ડ વાપરતો હતો. જોકે, મહિલાને શંકા જતાં તેણે આરોપીનો ફોન ચેક કરીને તેની બહેનનો સંપર્ક કર્યો, ત્યારે સત્ય બહાર આવ્યું કે આરોપીનું અસલી નામ મોસીન ખાન અહેમદ ખાન પઠાણ છે, અને તે પરણિત હોવા ઉપરાંત ત્રણ બાળકોનો પિતા છે. જ્યારે મહિલાએ આ બાબતે પૂછ્યું ત્યારે આરોપીએ તેને ધમકીઓ આપી હતી, જેના આધારે અમે ફરિયાદ દાખલ કરી છે.
પોલીસે વધુમાં જણાવ્યું કે, આરોપી મૂળ ગુજરાતનો જ છે અને છેલ્લા ત્રણેક વર્ષથી એએમટીએસમાં કોન્ટ્રાક્ટ બેઝ પર ડ્રાઇવર તરીકે નોકરી કરતો હતો. હાલમાં અમને તેની પાસેથી મોહિત પટેલ નામવાળા બનાવટી આધાર કાર્ડની ઝેરોક્સ મળી છે. અમે તેની પૂછપરછ કરી રહ્યા છીએ અને વધુ તપાસ માટે રિમાન્ડ પણ લઈશું જેથી જાણી શકાય કે આ ખોટું આધાર કાર્ડ બનાવવામાં તેને કોણે મદદ કરી હતી. આ ઉપરાંત, તેની પાસે અન્ય કોઈ નામના આધાર કાર્ડ છે કે કેમ, અન્ય સોશિયલ મીડિયા એકાઉન્ટ્સ છે કે કેમ અને અગાઉ તેણે કોઈ અન્ય યુવતીઓને આ રીતે ફસાવી છે કે કેમ તે દિશામાં પણ અમે તપાસ કરી રહ્યા છીએ. અત્યાર સુધીની પૂછપરછ અને ફોન રેકોર્ડ્સ જોતાં માત્ર એક જ મહિલા આ રીતે ભોગ બની હોવાનું સામે આવ્યું છે.
