વડોદરામાં કોંગ્રેસનું કમિટમેન્ટ : મહિલા, સિનિયર સિટીઝનો, વિદ્યાર્થીઓ માટે સિટી બસ ફ્રી, બે ટાઇમ પાણી | vadodara congress Manifesto for corporation election : Free city buses for women senior citizens
Vadodara Congress : વડોદરા મહાનગર પાલિકાની ચૂંટણીના પડઘમ વાગવાના શરૂ થઈ ગયા છે ત્યારે શહેર કોંગ્રેસ દ્વારા આગામી ચૂંટણી અંગે લોકો સમક્ષ મેનિફેસ્ટોની જગ્યાએ કમિટમેન્ટ શબ્દ વાપરીને જુદા જુદા વચનો આપ્યા છે. જેમાં શહેરની મૂળભૂત અને આંતરમાળખાકીય સુવિધાઓમાં પાણી, સફાઈ, રસ્તા સહિત સામાજિક અને જન સુવિધા બાબતે રહેઠાણ અને સ્મશાન ગૃહો ટાઉનહોલના નવીનીકરણ તથા ભ્રષ્ટાચાર વિરોધી અભિયાન, પારદર્શક કાર્ય પ્રણાલીના નેજા હેઠળ જનતા ઓડિટ અને પર્યાવરણ તથા શહેરના વિકાસ અંગે જુદા જુદા વચનોની લહાણી કરવામાં આવી હતી.
વડોદરા શહેર કોંગ્રેસના કમિટમેન્ટ (મેની ફેસ્ટો)માં જણાવાયું છે કે શહેરીજનોને તમામ વિસ્તારમાં પીવાનું બે વખત પાણી અને ખાડા મુક્ત રસ્તાનું નવીનીકરણ તથા સિનિયર સિટીઝનો અને મહિલાઓ સહિત વિદ્યાર્થીઓ માટે સીટી બસની સુવિધા સંપૂર્ણ ફ્રી કરવા કોંગ્રેસના કમિટમેન્ટમાં જણાવાયું હતું. એ જ રીતે રહેતા અને આવાસ મુખ્ય સમસ્યા હોવાથી શહેરની વસ્તી મુજબ નવા સરકારી આવાસો અને શહેરના જુદા જુદા સ્મશાન ગૃહો સહિત તાવોનું હોલ અને કોમ્યુનિટી હોલનું ઓડિટ કરાવીને તેનું નવીનીકરણ કરવાનું પણ કમિટમેન્ટ કર્યું હતું. આવી જ રીતે ભ્રષ્ટાચાર વિરોધી અભિયાન ચલાવીને પાલિકા દ્વારા જાહેર થતા ટેન્ડરોમાં થયેલા બેફામ ભ્રષ્ટાચારને ઉઘાડો પાડવા શ્વેત પત્ર પણ જાહેર કરવા કમિટમેન્ટમાં કોંગ્રેસ દ્વારા જણાવ્યું હતું. આ ઉપરાંત ભ્રષ્ટાચારીઓને સજા અપાવવા બાબતે પણ જણાવ્યું હતું. આ ઉપરાંત પારદર્શક કાર્ય પ્રણાલી મુજબ વહીવટમાં સંપૂર્ણ પારદર્શિતા લાવવા માટે તમામ કાર્યવાહી માટે જનતા ઓડિટ કરાવવા પણ અનોખું કમિટમેન્ટ જાહેર કરીને કામની વહેંચણી બાબતે સંપૂર્ણપણે ઓનલાઈન પદ્ધતિથી કાર્યવાહી કરવાની પણ કમિટમેન્ટમાં સ્પષ્ટ જણાવાયું હતું.
જ્યારે બીજી બાજુ અગાઉ વડોદરામાં આવેલા પૂરની યાદ અપાવીને શહેરમાં પર્યાવરણ અને શહેરના વિકાસ બાબતે કોંગ્રેસ દ્વારા કમિટમેન્ટમાં જણાવ્યું હતું કે વિશ્વામિત્રી મેગા પ્રોજેક્ટ હેઠળ વિશ્વામિત્રીની કાયાપલટ કરવા માટે સ્પેશિયલ ટાસ્ક ફોર્સ બનાવવાની પણ કમિટમેન્ટમાં જાહેરાત કરાઈ હતી. આવી જ રીતે વડોદરા શહેરમાં અવારનવાર આવતા વિશ્વામિત્રીમાં પુરને નિયંત્રણમાં રાખવા સહિત નદીના શુદ્ધિકરણ અને તેના બ્યુટીફિકેશન માટે પણ કમિટમેન્ટ કરાયું હતું. તેવી જ રીતે પર્યાવરણની સુરક્ષા બાબતે કમેન્ટમાં જણાવ્યું હતું કે વડોદરા શહેરની હવાની ગુણવત્તા સુધારવા માટે વાર્ષિક 10 ટકાની ગતિથી શહેરનું ગ્રીન કવર વધારવા પણ આગામી પાલિકા ચૂંટણીમાં કોંગ્રેસ પક્ષ સત્તામાં આવવાની આશા સાથે શહેરીજનોને જુદા જુદા સ્વપ્ન બતાવવામાં આવ્યા છે.
કોંગ્રેસ દ્વારા પાલિકાની આગામી ચૂંટણી અંગે આજે જાહેર કરવામાં આવેલા મેનીફેસ્ટોના ઘસાઈ ગયેલા શબ્દની સામે આધુનિક શબ્દ કમિટમેન્ટનો ઉપયોગ કરવામાં આવ્યો હતો.
શહેરના કમાટીબાગ, કાલાઘોડા સર્કલ પાસેના પંચમુખી હનુમાનજી મંદિર સામે યોજાયેલા કમિટમેન્ટ જાહેર કરવાના કાર્યક્રમમાં અમદાવાદના પૂર્વ ધારાસભ્ય હિંમતસિંહ પટેલ પ્રદેશ પ્રવક્તા પર્થિવ કઠવાડિયા અને શહેર કોંગ્રેસ પ્રમુખ ઋત્વિજ જોશી તથા પાલિકા વિરોધ પક્ષના તત્કાલીન સિનિયર કોર્પોરેટર ચંદ્રકાંત ભથ્થું દ્વારા શહેરીજનોને આગામી ચૂંટણી સંદર્ભે અપાયેલા જુદા જુદા કમિટમેન્ટ (મેની ફેસ્ટો) અંગે વિગતવાર માહિતી આપી હતી.
