મહેસાણાના લાડોલ નજીક ટ્રક અને બાઈક વચ્ચે ભયાનક અકસ્માત, વડાલીના 2 ના મોત; 1 ગંભીર | Mehsana Ladol Accident 2 youths from Vadali die 1 critical
Mehsana Accident : મહેસાણા જિલ્લાના લાડોલ વિસ્તારમાં સોમવારે એક ગમખ્વાર અકસ્માત સર્જાયો હતો. શોભાસણાથી ટેચાવા હાઈવે પર પૂરપાટ દોડતા એક ટ્રકે બાઈકને જોરદાર ટક્કર મારી હતી, જેમાં વડાલી તાલુકાના પહાડી પોલ ગામના બે યુવકોના ઘટનાસ્થળે જ મોત નીપજ્યા છે. આ અકસ્માતમાં અન્ય એક યુવક પણ ગંભીર રીતે ઘાયલ થયો છે, જેની હાલત અત્યંત નાજુક હોવાનું જાણવા મળ્યું છે.
તમાકુના સેમ્પલ બતાવવા જતા હતા યુવકો
અહેવાલ મુજબ, પહાડી પોલ ગામના બે યુવકો કોઈ કામથી બાઈક લઈને મહેસાણા તરફ નીકળ્યા હતા. પ્રાથમિક માહિતી અનુસાર, તેઓ કોઈને તમાકુના સેમ્પલ બતાવવા જઈ રહ્યા હતા. આ દરમિયાન લાડોલ વિસ્તારના હાઈવે પર સામેથી આવતા એક ટ્રક ચાલકે તેમને અડફેટે લીધા હતા. ટક્કર એટલી ભયાનક હતી કે બંને યુવકો બાઈક પરથી ફંગોળાઈ ગયા હતા અને ઘટનાસ્થળે જ દમ તોડી દીધો હતો. અકસ્માત બાદ ટ્રક ચાલક ફરાર થઈ ગયો હોવાની માહિતી મળી છે.
ગંભીર રીતે ઈજાગ્રસ્ત યુવકને સારવાર માટે ખસેડાયો
અકસ્માતમાં ઈજાગ્રસ્ત થયેલા અન્ય એક યુવકને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો છે. તેની હાલત પણ અત્યંત ગંભીર હોવાથી તેને મહેસાણાની મોટી હોસ્પિટલમાં પણ રેફર કરવામાં આવી શકે છે. પોલીસને અકસ્માતની જાણ થતા જ ઘટનાસ્થળે પહોંચી છે અને ગુનો નોંધીને ફરાર ટેન્કર ચાલકને પકડી પાડવા માટે તપાસ હાથ ધરી છે. આ ઘટનાથી વડાલીના પહાડી પોલ ગામમાં શોકનો માહોલ છવાઈ ગયો છે.
