બોર્ડની ઉત્તરવહીઓની ચકાસણી પૂરી, આવતીકાલથી 1000 ઉપરાંત સ્કૂલોમાં વાર્ષિક પરીક્ષા | annual exam in schools from monday
વડોદરાઃ વડોદરા શહેર અને જિલ્લાના ૧૯ મૂલ્યાંકન કેન્દ્રો પર ધો.૧૦ અને ધો.૧૨ની બોર્ડ પરીક્ષાની ઉત્તરવહીઓ તપાસવાની કામગીરી પૂરી થઈ છે અને હવે શિક્ષકો તા.૬ એપ્રિલ, સોમવારથી સ્કૂલોમાં શરુ થનારી વાર્ષિક પરીક્ષાઓમાં વ્યસ્ત થઈ જશે.
શિક્ષકોએ ૧૯ માર્ચથી ઉત્તરવહીઓ તપાસવાનું શરુ કર્યું હતું. ૮૦૦ જેટલા શિક્ષકોએ બે લાખથી વધારે ઉત્તરવહીઓની ચકાસણી પૂર્ણ કરી છે.
મળતી વિગતો પ્રમાણે શહેર -જિલ્લાની તમામ સરકારી પ્રાથમિક શાળાઓ તથા તમામ માધ્યમિક સ્કૂલોમાં ધો.૩ થી ૮ અને ધો.૯ તેમજ ૧૧ની વાર્ષિક પરીક્ષાનો તા.૬ એપ્રિલથી પ્રારંભ થશે.૧૦૦૦ કરતા વધારે સ્કૂલોમાં ૩ લાખથી વધારે વિદ્યાર્થીઓ પરીક્ષા આપશે.આ પરીક્ષા તા.૧૭ એપ્રિલ સુધી ચાલશે.વિદ્યાર્થીઓને ઉનાળાની કાળઝાળ ગરમીમાં પરીક્ષા આપવાનો વારો આવશે.મોટાભાગની ગ્રાન્ટેડ સ્કૂલોએ દરેક શાળા વિકાસ સંકુલ (સ્કૂલોનું જૂથ) સ્તરે કોમન પેપર કાઢીને પરીક્ષા લેવાની વ્યવસ્થા ગોઠવી છે.
વિદ્યાર્થીઓ માટે તો ૧૮ એપ્રિલથી વેકેશન શરુ થશે પણ શિક્ષકો માટે આ વખતે વેકેશન ટુંકાઈ જવાનું છે.કારણકે પરીક્ષા બાદ શિક્ષકોને ઉત્તરવહીઓ તપાસવાની સાથે કોર્પોરેશનની ચૂંટણીની કામગીરી કરવાની આવશે અને એ પછી વસતી ગણતરીમાં પણ જોતરાવું પડશે.
પોલીસ પહેરા હેઠળ ઉત્તરવહીઓ રવાના કરાશે
વડોદરામાં બોર્ડ પરીક્ષાની ઉત્તરવહીઓ તપાસવાનું કામ પૂરુ થયું છે.એક- બે દિવસમાં ઉત્તરવહીઓને ગાંધીનગર ખાતે રવાના કરવામાં આવશે.માધ્યમિક અને ઉચ્ચતર માધ્યમિક શિક્ષણ બોર્ડે નક્કી કરેલા વાહનમાં જ ઉત્તરવહીઓને મોકલવામાં આવશે અને દરેક વાહનમાં પોલીસની પણ તૈનાતી થશે.
ગ્રાન્ટેડ સ્કૂલોના ૬૦૦ જેટલા શિક્ષકોને વસતી ગણતરીની કામગીરી સોંપાઈ
શિક્ષકોને આ વખતે આખા વેકેશન દરમિયાન કામ કરવાનો વારો આવી શકે છે.મળતી વિગતો અનુસાર શહેરની ગ્રાન્ટેડ માધ્યમિક સ્કૂલોના ૬૦૦ જેટલા શિક્ષકોને અત્યાર સુધીમાં વસતી ગણતરીની કામગીરી માટેના ઓર્ડર તંત્ર દ્વારા કરાયા છે.આ જ રીતે સરકારી પ્રાથમિક સ્કૂલોના શિક્ષકોને પણ કામગીરી સોંપાઈ રહી છે.જોકે એ પહેલા શિક્ષકોને ચૂંટણી તંત્ર દ્વારા મ્યુનિસિપલ કોર્પોરેશનની ચૂંટણી માટે મતદાન મથકો પર અને મતગણતરીના દિવસે ફરજ સોંપશે તે અલગ.
