મિડલ ઈસ્ટમાં સંકટ વચ્ચે ભારતની જરૂરિયાતો પૂરી કરશે આ નાના-નાના દેશો, રશિયાથી પણ ઓઇલ ખરીદીમાં વધારો | India Defies Global Energy Crisis Diversifies Oil Imports and Boosts Russian Crude by 90 percent
India Defies Global Energy Crisis: મિડલ ઈસ્ટમાં વધી રહેલા તણાવ અને ઈરાન દ્વારા વ્યૂહાત્મક રીતે મહત્ત્વના ગણાતી હોર્મુઝ સ્ટ્રેટને બંધ કરી દેવાતા સમગ્ર વિશ્વમાં તેલ અને ગેસનું સંકટ પેદા થયું છે. દુનિયાના કુલ ઊર્જા પરિવહનનો 20% હિસ્સો આ રસ્તેથી પસાર થાય છે અને ભારત પોતાની જરૂરિયાતનું 40થી 50% ક્રૂડ ઓઇલ આ માર્ગે મંગાવે છે. આમ છતાં, ભારતની મજબૂત કૂટનીતિને કારણે અન્ય દેશોની સરખામણીએ ભારતીય બજારોમાં આ જંગની અસર ઓછી જોવા મળી રહી છે. ભારત સરકારે મોટા દેશો પર નિર્ભર રહેવાને બદલે આફ્રિકાના નાના અને અજાણ્યા દેશો સાથે હાથ મિલાવીને આ મુસીબતનો રસ્તો કાઢ્યો છે, જેના કારણે છેલ્લા એક મહિનામાં LPG અને LNGની ઉપલબ્ધતામાં નોંધપાત્ર સુધારો થયો છે.
LPG માટે નાઇજીરિયા, ઘાના અને અંગોલા જેવા દેશોની લેવાઈ મદદ
પેટ્રોલિયમ મંત્રાલયના જણાવ્યા અનુસાર, ભારતે ક્રૂડ ઓઇલ અને ગેસના સોર્સિંગમાં વિવિધતા લાવી છે જેથી હોર્મુઝ સ્ટ્રેટમાં અવરોધ આવવા છતાં સપ્લાય ખોરવાય નહીં. ભારત અત્યારે LPG માટે અમેરિકા, રશિયા, કેનેડા અને નોર્વે ઉપરાંત નાઇજીરિયા, અલ્જીરિયા, ઘાના, કોંગો અને અંગોલા જેવા પશ્ચિમ આફ્રિકાના દેશોના સંપર્કમાં છે, જ્યાંથી સપ્લાય આવવા પણ લાગી છે. તે જ રીતે LNG માટે કેમરૂન, ઇક્વેટોરિયલ ગિની અને મોઝામ્બિક જેવા દેશોની મદદ લેવામાં આવી રહી છે. બીજી તરફ, સાઉદી અરેબિયા અને UAE પણ હોર્મુઝને બાયપાસ કરતી પાઈપલાઈનો(જેમ કે ઈસ્ટ-વેસ્ટ અને હબશાન-ફુજૈરાહ પાઈપલાઈન) દ્વારા ભારતને તેલ પહોંચાડી રહ્યા છે, જે યુદ્ધના માહોલમાં મોટી રાહત સમાન છે.
આ પણ વાંચો: અમેરિકન પાઈલોટ પકડાશે તો પણ ઈરાન એનું કંઈ નહીં બગાડી શકે? જાણો જિનિવા એક્ટ વિશે
રશિયન ઓઇલની આયાતમાં 90%નો ઉછાળો
આ સંકટ સમયે રશિયા ફરી એકવાર ભારત માટે મહત્ત્વનું સાબિત થયું છે. ડિસેમ્બર 2025 અને જાન્યુઆરી-ફેબ્રુઆરી 2026 દરમિયાન રશિયા પાસેથી તેલની ખરીદીમાં જે ઘટાડો જોવા મળ્યો હતો, તેમાં માર્ચ મહિનામાં જોરદાર ઉછાળો આવ્યો છે. અમેરિકાએ રશિયન તેલની ખરીદી માટે ભારતને આપેલી 30 દિવસની વિશેષ છૂટનો લાભ લઈને ભારતે રશિયા પાસેથી તેલની આયાતમાં ફેબ્રુઆરીની તુલનાએ 90%નો વધારો કર્યો છે. મિડલ ઈસ્ટમાં સપ્લાયમાં 15%નો ઘટાડો થયો હોવા છતાં, રશિયા અને આફ્રિકન દેશોના સાથને કારણે ભારતમાં ઈંધણની અછત સર્જાઈ નથી.
