અમદાવાદ: સાબરમતીમાં દારૂનો જાણે ‘ગૃહ ઉદ્યોગ’, દેશી પોટલીઓ બાંધતા બુટલેગરો અને મહિલાઓનો વીડિયો વાઈરલ | Ahmedabad News Sabarmati Desi Liquor Packing Viral Video Two Bootleggers and Two Women
Ahmedabad News: ગુજરાતમાં કડક દારૂબંધીના દાવાઓ વચ્ચે સાબરમતી વિસ્તારમાં કાયદો અને વ્યવસ્થાના લીરેલીરા ઉડાવતો એક ચોંકાવનારો કિસ્સો પ્રકાશમાં આવ્યો છે. સાબરમતી પોલીસ સ્ટેશનની હદમાં આવેલા સરસ્વતીનગરમાં એક બુટલેગર પોતાના ઘરમાં બેસીને બે મહિલાઓ સાથે મળીને જાણે કોઈ ગૃહ ઉદ્યોગ ચલાવતો હોય તેમ દેશી દારૂનું પેકિંગ કરી રહ્યો હોવાનો વીડિયો સોશિયલ મીડિયા પર વાઈરલ થયો છે.
ખાલી કોથળીઓમાં દારૂનું પેકિંગ
આ વીડિયોમાં સ્પષ્ટ જોઈ શકાય છે કે મોટી સંખ્યામાં ખાલી કોથળીઓમાં દારૂ ભરવામાં આવી રહ્યો છે. આ ઘટના સામે આવ્યા બાદ સ્થાનિક પોલીસની કામગીરી પર ગંભીર સવાલો ઉભા થયા છે. વીડિયો વાઈરલ થતાં જ હરકતમાં આવેલી સાબરમતી પોલીસે તપાસ હાથ ધરી હતી.
બે મહિના જૂનો વીડિયો
પોલીસના જણાવ્યા અનુસાર, આ વીડિયો આશરે બે મહિના જૂનો હોવાનું પ્રાથમિક તપાસમાં બહાર આવ્યું છે. સાબરમતી પોલીસે આ અંગે સ્પષ્ટતા કરતા જણાવ્યું હતું કે, વીડિયોમાં દેખાતા મુખ્ય આરોપી બુટલેગર ભરત ઠાકોર વિરુદ્ધ કાયદેસરનો ગુનો નોંધી આગળની કાર્યવાહી હાથ ધરવામાં આવી છે. જો કે બે મહિના સુધી પોલીસ આ પ્રવૃત્તિથી અજાણ હતી કે કેમ તે બાબત હાલ ચર્ચાનો વિષય બની છે.
પોલીસની મિલીભગતની શક્યતા!
ઉલ્લેખનીય છે કે સાબરમતી પોલીસ સ્ટેશન વિસ્તાર અગાઉ પણ દારૂના અડ્ડાઓને લઈને વિવાદમાં રહી ચૂક્યું છે. થોડા સમય પહેલા જ બ્રિજ નીચે સોફા અને બેઠક વ્યવસ્થા સાથે ચાલતા હાઈટેક દારૂના અડ્ડાના દ્રશ્યો સામે આવ્યા હતા. વારંવાર સામે આવતી આવી બેદરકારીને પગલે હવે ઉચ્ચ પોલીસ અધિકારીઓ દ્વારા સ્થાનિક પીઆઈ સામે કડક શિક્ષાત્મક કાર્યવાહી કરવામાં આવે તેવી પૂરેપૂરી શક્યતા છે. શહેરમાં જાહેરમાં દારૂનું વેચાણ અને પેકિંગ થતું હોવા છતાં સ્થાનિક સ્તરે કોઈ રોકટોક ન હોવાથી પોલીસની મિલીભગતની આશંકાઓ પણ સેવાઈ રહી છે.
