પાકિસ્તાને ડ્રોનથી ડ્રગ્સ-હથિયારો બાદ ભારતમાં હવે નકલી નોટો પણ ઘૂસાડી | After smuggling drugs and weapons through drones Pak now smuggles fake currency notes into India
અમૃતસરની પાક. સરહદે બીએસએફને નકલી નોટોનો જથ્થો મળ્યો
હાલ બે લાખ રૂપિયાની ફેક કરન્સી મળી છે પરંતુ પાક.નું બહુ મોટું કાવતરું હોવાની અધિકારીઓને શંકા
અમૃતસર: પાકિસ્તાન અત્યાર સુધી ડ્રોનની મદદથી હથિયારો, ડ્રગ્સ વગેરે ભારતમાં ઘૂસાડવા પ્રયાસ કરી રહ્યું હતું, અનેક વખત આવા હથિયારો અને ડ્રગ્સ ઝડપાઇ ચુક્યા છે. હવે પાકિસ્તાને તેમાં નકલી નોટો પણ સામેલ કરી છે. પંજાબ સરહદેથી ડ્રોનની મદદથી પાકિસ્તાને ભારતમાં નકલી નોટો ઘૂસાડી છે. બીએસએફને આવી રૂ. ૨.૫ લાખની નકલી નોટો મળી આવી છે.
પંજાબના અમૃતસર પાસે પાકિસ્તાન સરહદેથી પંજાબ પોલીસ અને બીએસએફને બનાવટી નોટો મળી આવી છે તેને પાકિસ્તાન દ્વારા ડ્રોનથી ભારતમાં નાખવામાં આવી હોવાની શક્યતાઓ છે. ઘરીન્ડા વિસ્તારમાં સર્ચ ઓપરેશન દરમિયાન આ ફેક નોટો મળી આવી છે, અધિકારીઓનું માનવું છે કે આ વિસ્તારમાં પ્રથમ વખત એવુ બન્યું છે કે પાકિસ્તાને ડ્રોનથી ફેક નોટો ઘૂસાડી છે. હાલમાં સામાન્ય રકમ ઝડપાઇ છે પરંતુ પાકિસ્તાનનું આ બહુ જ મોટું કાવતરુ હોવાની અધિકારીઓને શંકા છે.
ફેક કરન્સી હથિયારો અને ડ્રગ્સ જેટલી જ ઘાતક માનવામાં આવે છે, કેમ કે ફેક કરન્સી કે નકલી નોટો ભારતના અર્થતંત્રને ડામાડોળ કરી શકે છે. હાલમાં જે પણ નોટો જપ્ત કરાઇ છે તેને ફોરેન્સિંક તપાસ માટે મોકલવામાં આવી છે, આ ફોરેન્સિક તપાસથી નોટો ક્યાં છપાઇ વગેરે માહિતી મેળવી શકાશે. નોટબંધી કરવામાં આવી તે બાદથી નકલી નોટોની અનેક ઘટનાઓ દેશમાં સામે આવી ચુકી છે. હવે પાકિસ્તાન દ્વારા પણ ડ્રોનની મદદથી નકલી નોટો ઘૂસાડાઇ રહી હોવાથી સુરક્ષા એજન્સીઓએ વધુ એલર્ટ રહેવું પડી શકે છે.
