મકાઉ દેશમાં નોકરીના નામે સુરતના એજન્ટ દ્વારા રૂા.10 લાખની ઠગાઈ | Surat agent cheats man of Rs 10 lakh in the name of job in Macau
શાપર પોલીસ મથકમાં ફરિયાદ નોંધાઈ
શાપરમાં રહેતાં દંપતી સહિત પરિવારના ચાર સભ્યો ટુરીસ્ટ વીઝા પર મકાઉ પહોંચી આરોપીને કોલ કરતાં વિશ્વાસઘાત થયાની જાણ થઈ
રાજકોટ: શાપરની સર્વોદય સોસાયટીમાં રહેતાં રવિભાઈ જીવાભાઈ પરમાર અને તેના પત્ની વર્ષાબેન સહિત પરિવારના ચાર સભ્યોને મકાઉ દેશમાં નોકરી અપાવી દેવાનું કહી રમેશ રાઠોડ (રહે. સુરત) નામના શખ્સે ટુરીસ્ટ વીઝા મકાઉ મોકલી નોકરી નહીં અપાવી, રૂા.૧૦.પ૩ લાખ મેળવી ઠગાઈ કર્યાની શાપર પોલીસ મથકમાં ફરિયાદ નોંધાઈ છે.
રવિભાઈએ પોલીસને જણાવ્યું કે ર૦ર૪માં તેના નાનાભાઈ રોહિતના લગ્ન ખર્ચના કારણે પરિવાર પર દેણું થઈ ગયું હોવાથી તેણે વિદેશમાં જઈ નોકરી કરી રૂપિયા કમાવવાનું વિચાર્યું હતું. આ માટે તેણે તેના સાળા અલ્પેશભાઈ રમેશભાઈ ચાવડા (રહે. રાજકોટ)ને વાત કરતાં તેણે પણ સાથે આવવાનું જણાવ્યું હતું. આથી બંનેએ વિદેશમાં જઈ નોકરી કરવાનું નક્કી કરી એજન્ટની તપાસ કરી હતી.
આ સમયે તેના સંબંધી મારફતે આરોપી રમેશ રાઠોડનો સંપર્ક થયો હતો. આરોપીએ એજન્ટ તરીકેની ઓળખ આપી હું લોકોને અલગ-અલગ દેશમાં ટુરીસ્ટ વીઝાના આધારે મોકલી તે દેશમાં સારી એવી નોકરી અપાવી વિદેશમાં કાયમી કરી આપવાનું એજન્ટ તરીકેનું કામ કરૂં છું તેમ વાત કરી હતી. આથી તે ચાર લોકો હોવાથી રશિયામાં જવાનું કહેતાં આરોપીએ હું રશિયાનાં વીઝા, ફલાઈટ ટિકિટો આપી તમે ત્યાં પહોંચો ત્યારે સારી હોટલમાં, સારા પગારમાં, બધાની નોકરી પાક્કી કરાવી આપીશ. તેના બદલામાં એક વ્યક્તિ દીઠ ૩.પ૦ લાખ આપવા પડશે તેમ કહ્યું હતું.
ત્યાર બાદ તા.૯-ર-ર૦ર૬નાં શાપરમાં લગ્નપ્રસંગમાં આવેલા આરોપીએ તેને જણાવ્યું હતું કે રશિયાના વીઝા મળી શકે તેમ નથી પરંતુ મકાઉ વીઝા ફ્રી દેશ છે. કોઈ વર્ક પરમીટની જરૂરિયાત નથી. ત્યાં મારા ઓળખીતા લોકો છે. અગાઉથી જ તમારી બધાની નોકરી પાકકી કરાવી આપું છું. ત્યાં પહોંચો તે સાથે જ ચારેયની નોકરીની જવાબદારી મારી ઉપર તે માટે તમારે વ્યક્તિ દીઠ ર.૯૦ લાખ આપવા પડશે તેમ કહેતાં તેમણે હા પાડી આરોપીને અગાઉના અને કટકે-કટકે મળી રૂા.પ.૬૭ લાખ અને તેના સાળાએ રૂા.૪.૮૬ લાખ મળી કુલ રૂા. ૧૦.પ૩ લાખ તેના, તેના પત્ની વર્ષાબેન, તેના સાળા અલ્પેશ અને અલ્પેશની પત્ની જાનવીબેનના વીઝા કરાવવા અને નોકરી અપાવવા તેમજ પરમેનેન્ટ કરાવવા આરોપીને આપ્યા હતા. તેના બદલામાં આરોપીએ ચારેયની ફલાઈટ ટિકિટો આપી, મેં તમારી મકાઉમાં નોકરી પાક્કી કરી આપી છે, ત્યાં પહોંચતા મારો માણસ આવી જશે અને બધી વ્યવસ્થા કરી દેશે તેમ કહેતાં ચારેય દિલ્હીથી બેન્કોક અને ત્યાંથી ગઈ તા.૧૭ના મકાઉ પહોંચ્યા હતા. જયાંથી આરોપીને ફોન કરતાં તેણે તમારૂ બાકી રહેલ પેમેન્ટ પહેલાં પૂરૂ કરો ત્યાર બાદ કામ મળશે તેમ કહેતાં તેને નોકરી બાબતે પૂછતાં તમે તમારી રીતે જોઈ લો તેમ કહી ફોન કાપી નાખ્યો હતો. બીજી તરફ તેણે તેના મોટાસાળાનો સંપર્ક કરી દિવસ ત્રણમાં ટુરીસ્ટ વીઝા પુરા થતાં હોવાથી તેના રીર્ટન ફલાઈટની ટિકિટોની વ્યવસ્થા કરતાં તમામ ગઈ તા.ર૦ના પરત આવ્યા બાદ ફરિયાદ નોંધાવી હતી.
