મહાદેવ એપ : બુર્જ ખલીફાનાં એપાર્ટમેન્ટ સહિત રૂ. 1700 કરોડની મિલકતો ટાંચમાં | Mahadev App: Properties worth Rs 1700 crore including Burj Khalifa apartment attached
– પ્રમોટર સૌરભ ચંદ્રાકાર સામે ઇડીની કાર્યવાહી
– દુબઇ હિલ્સ એસ્ટેટમાં 18 હાઇ વેલ્યુ લક્ઝરી વિલા ઉપરાંત એપાર્ટમેન્ટ પણ જપ્ત કર્યા : ઇડી
ગુવાહાટી : મહાદેવ એપનાં પ્રમોટરો પૈકીનાં એક સૌરભ ચંદ્રાકરની લગભગ ૧૭૦૦ કરોડ રૂપિયાની સ્થિર મિલકતો ટાંચમાં લેવામાં આવી છે. આ સંપત્તિઓ મુખ્યત્વે દુબઇમાં આવેલી છે. જેમાં બુર્જ ખલીફાની પણ મિલકત સામેલ છે. આ કાર્યવાહી મની લોન્ડરિંગની તપાસ હેઠળ કરવામાં આવી છે તેમ એન્ફોર્સમેન્ટ ડિરેક્ટોરેટ (ઇડી)એ એક નિવેદનમાં જણાવ્યું છે.
કેન્દ્રીય તપાસ એજન્સીએ જણાવ્યું છે કે આ કેસમાં છત્તીસગઢનાં અનેક મોટા રાજકીય નેતાઓ અને અધિકારીઓ સંડોવાયેલા છે. એજન્સીએ એક નિવેદનમાં જણાવ્યું હતું કે બુધવારે એજન્સીની રાયપુર ઝોનલ ઓફિસે પ્રિવેન્શન ઓફ મની લોન્ડરિંગ એક્ટ (પીએમએલએ) હેઠળ એક વચગાળાનો આદેશ જારી કર્યો હતો.
આ આદેશ હેઠળ દુબઇ હિલ્સ એસ્ટેટમાં ૧૮ હાઇ વેલ્યુ લક્ઝરી વિલા અને એપાર્ટમેન્ટ ટાંચમાં લેવામાં આવ્યા છે. જેમાં હિલ્સ વ્યુ, ફેયરવે રેસિડન્સી અને સિદરામાં સ્થિત સંપત્તિઓ સામેલ છે. એજન્સીએ વધુમાં જણાવ્યું હતું કે બુર્જ ખલીફામાં આવેલા એપાર્ટમેન્ટ ઉપરાંત બિઝનેસ બે અને એસએલએસ હોટેલ એન્ડ રેસિડન્સીમાં અનેક હાઇ એન્ડ એપાર્ટમેન્ટ ટાંચમાં લેવામાં આવ્યા છે. ઉલ્લેખનીય છે કે બુર્જ ખલીફા વિશ્વની સૌથી ઉંચી ઇમારત છે અને તેની ઉંચાઇ ૮૨૯.૮ મીટર છે. આ આદેશ હેઠળ દિલ્હીમાં પણ બે સ્થિર મિલકતો ટાંચમાં લેવામાં આવી છે.
એજન્સીએ જણાવ્યું હતું કે આ તમામ સંપત્તિઓનું કુલ મૂલ્ય ૧૭૦૦ કરોડ રૂપિયા આંકવામાં આવ્યું છે. ઇડીએ જણાવ્યું હતું કે આ સંપત્તિઓ મહાદેવ ઓનલાઇન બુક બેટિંગ એપનાં મુખ્ય પ્રમોટરો પૈકીનાં એક સૌરભ ચંદ્રાકારની છે.
