ટ્રમ્પના 48 કલાકમાં અલ્ટીમેટમ પર ઇરાનની વળતી ધમકી : ગલ્ફ દેશોમાં તમારાં મથકો પર મિસાઇલ્સ વરસશે | Iran’s counter threat to ultimatum: Missiles will rain down on your bases in Gulf countries
યુદ્ધ હવે તો આરપારનું બની રહ્યું છે : નિરીક્ષકો
યુદ્ધ વિરામ સ્વીકાર્ય નથી : પહેલાં નુકસાનની ભરપાઈ થવી જોઇએ : હુમલા ન થવાની ગેરેન્ટી મળવી જોઇએ : અરાઘચી
નવી દિલ્હી: અમેરિકાના પ્રમુખ ટ્રમ્પે ઇરાનને હોર્મુઝ સ્ટેઇટ્સ ખોલવા માટે ૪૮ કલાકનું અલ્ટીમેટમ આપ્યું છે પરંતુ ઇરાન તેથી જરા પણ ડગ્યું નથી. ઉલટાની અમેરિકા ઇઝરાયલને સામી ધમકી આપી છે. ઇઝરાયલી સૈન્યના પ્રમુખોએ ચેતવણી આપી છે ઇરાનનું ફ્યુએલ અને એનર્જી પ્લાંટ ઉપર કોઈ પણ હુમલો કરાશે તો તેના જવાબમાં સંપૂર્ણ ગલ્ફ વિસ્તારમાં રહેતાં અમેરિકા અને તેમના સાથી દેશોના એનર્જી પ્લાંટ, આઈટી નેટવર્ક અને ડીસેલિનેશન સુવિધાઓ ઉપર મિસાઇલ્સ વરસાવશે.
આટલું જ નહીં પરંતુ ઇરાને યુદ્ધ વિરામ પણ સ્વીકારવાનો ઇનકાર કરી દીધો છે. ઇરાનના વિદેશમંત્રી અરાઘચીએ જાપાનની ન્યૂઝ એજન્સી ક્યોડો ન્યુઝને આપેલા ઇન્ટરવ્યુમાં સ્પષ્ટ શબ્દોમાં કહ્યું હતું કે ઇરાન કોઈ પણ યુદ્ધ વિરામ સ્વીકારશે નહીં. તે ગત વર્ષે થયેલી પરિસ્થિતિ ફરી ઊભી થવા દેવા માગતું નથી. ઇરાન યુદ્ધનો સંપૂર્ણ વ્યાપક અને સ્થાયી અંત ઇચ્છે છે. તે એક માત્ર સ્વીકાર્ય સમાધાન છે. યુદ્ધનો સંપૂર્ણ અને કાયમી અંતઃ સાથે નુકસાનની ભરપાઈ થવી જોઇએ અને ફરી હુમલા ન થાય તેની ગેરેન્ટી મળવી જોઇએ.
તે સર્વવિદિત છે કે અમેરિકા એ ઇરાનને પરમાણુ સમજૂતી માટે ત્રણ તક આપી છે. પરંતુ ત્રણે વખત મીટીંગ અસફળ રહી. તેથી ૨૮ ફેબુ્રઆરી ૨૦૨૬ના દિવસે ઇઝરાયલ અમેરિકાએ સાથે મળી ઇરાન પર હુમલો કર્યો. તેમણે ઇરાનની સેનાનાં મથકોને નિશાંન બનાવ્યાં. ઇરાનના સુપ્રીમ વડા યાયાતોલ્લા અલિ ખોમેનેઇને ખતમ કરી નાખ્યા. ઇરાનનાં તેલનાં સ્થાનો પર હુમલા કરી રીફાઈનરીઓને નુકસાન કરી તેની ઉત્પાદન ક્ષમતા પ્રભાવિત કરી ઇરાનને સજ્જડ ઘા માર્યો છે.
તેની વળતી કાર્યવાહીમાં ઇરાને મિસાઇલ ડ્રોન એટેક શરૂ કર્યા. અમેરિકાની તે દેશોમાંની ૨૨,૦૦૦ કરોડની ડીફેન્સ સીસ્ટમ ખતમ કરી નાખી. સાથે હોર્મુઝ સ્ટેઇટસ અમેરિકા અને ઇઝરાયલ માટે બંધ કરી તે ખોલવા માટે અમેરિકાએ ઇરાનને ૪૮ કલાકનું અલ્ટીમેટમ આપ્યું છે. ઇરાન તે ખોલવા માટે શરતો મુકે છે. અમેરિકાને અને ઇઝરાયલને તે શર્તો સ્વીકાર્ય નથી. તેવામાં ઇરાને ૪,૦૦૦ કીમી દૂર ડીયાગોગાર્શિયાના હિન્દ મહાસાગરમાં રહેલાં અમેરિકા અને ઇંગ્લેન્ડના સંયુક્ત લશ્કરી મથક ઉપર મિસાઇલ્સ વહેતાં મુકી દુનિયાને આંચકો આપી દીધો છે. હવે તો નિરીક્ષકો કહે છે કે આ યુદ્ધ આરપારનું બની રહ્યું છે.
