‘દાદા તમને બાઈકમાં ઘરે મૂકી જઈએ…’ રાજુલાના માંડલમાં 82 વર્ષના વૃદ્ધને ધમકાવીને સોનાના બટન લૂંટનારા બે શખસો ઝડપાયા | Amreli LCB Arrests Two Accused for Robbing 82 Year Old Man in Rajula
Amreli LCB Rajula Robbery Case : અમરેલીના રાજુલા તાલુકાના માંડલ ગામના વૃદ્ધને બાઇક પર બેસાડી સોનાના બટન લૂંટનાર બે શખસો ઝડપાયા છે. આરોપીઓએ 82 વર્ષીય વૃદ્ધને ઘરે મૂકી જવાની લાલચ આપી લૂંટ ચલાવી હતી. સમગ્ર મામલે LCBએ મુદ્દામાલ સાથે બે રીઢા ગુનેગારોને દબોચીને આગળની કાર્યવાહી હાથ ધરી છે.
રાજુલાના માંડલમાં 82 વર્ષના વૃદ્ધને ધમકાવીને સોનાના બટન લૂંટનારા બે શખસો ઝડપાયા
રાજુલાના ડુંગર વિસ્તારમાં થોડા દિવસો પહેલા બે શખસોએ એક વૃદ્ધને નિશાન બનાવી સોનાના બટનની લૂંટ ચલાવી હતી. સમગ્ર મામલે વૃદ્ધે પોલીસમાં ફરિયાદ નોંધાવી હતી, જેને લઈને અમરેલી LCB(લોકલ ક્રાઈમ બ્રાન્ચ)ની ટીમે આરોપીને ઝડપી પાડવા તપાસ હાથ ધરી હતી. જેમાં LCBએ ગણતરીના દિવસોમાં બંને આરોપીને ઝડપી પાડ્યા હતા. પકડાયેલા બંને આરોપીઓ અગાઉ પણ અનેક ગુનાઓમાં સંડોવાયેલા હોવાનું બહાર આવ્યું છે.
શું છે સમગ્ર ઘટના?
ઘટના એમ છે કે, રાજુલાના માંડલ ગામે રહેતા 82 વર્ષીય વૃદ્ધ દુલાભાઈ ભગવાનભાઈ નકુમ ગત 19 માર્ચ, 2026ના રોજ સાંજના સમયે પસાર થતા હતા, ત્યારે બે અજાણ્યા શખસો મોટરસાયકલ પર આવ્યા હતા અને વૃદ્ધને તેમના ઘરે મૂકી જવાની વાત કરી હતી. આ પછી આરોપીઓએ વૃદ્ધને વિશ્વાસમાં લઈને બાઇક પર બેસાડ્યા હતા. જો કે, ઘરે ઉતારવાને બદલે થોડે દૂર લઈ જઈને વૃદ્ધને માર મારવાની ધમકી આપી ડરાવી-ધમકાવી તેમના ખમીસમાં પહેરેલા આશરે બે તોલા સોનાના ત્રણ બટન બળજબરીપૂર્વક કાઢીને બંને આરોપી નાસી છૂટ્યા હતા.
રૂ.1.51 લાખનો મુદ્દામાલ જપ્ત
આ અંગે ડુંગર પોલીસ મથકમાં વૃદ્ધે ફરિયાદ નોંધાવી હતી. સમગ્ર મામલે અમરેલી LCBની ટીમે ટેકનિકલ સોર્સ અને ખાનગી બાતમીદારોની મદદથી રાજુલાના તત્વજ્યોતિ વિસ્તારમાં રહેતા સુજલ ઉર્ફે હુડી રાજુભાઈ સોલંકી(ઉં.વ. 20) અને સોનુ ઉર્ફે ભુરો કિશનભાઈ સોલંકી(ઉં.વ. 25)ને ઝડપી પાડ્યા હતા. પોલીસે આરોપી પાસેથી રૂ.1.21 લાખની કિંમતના 9.380 ગ્રામ વજનના સોનાના ત્રણ બટન, ગુનામાં વપરાયેલું બાઈક સહિત કુલ રૂ.1.51 લાખનો મુદ્દામાનલ જપ્ત કર્યો છે.
બંને આરોપીઓ રીઢા ગુનેગાર
પોલીસ તપાસમાં ખૂલ્યું કે, પકડાયેલ બંને આરોપીઓ રીઢા ગુનેગાર છે. સુજલ વિરુદ્ધ રાજુલા અને પીપાવાવ મરીન પોલીસ સ્ટેશનમાં મારામારી અને ચોરીના ગુનાઓ નોંધાયેલા છે. જ્યારે સોનુ વિરુદ્ધ રાજુલામાં લૂંટ, ધમકી અને મારામારી સહિત કુલ ત્રણથી વધુ ગુનાઓ નોંધાયેલા છે. સમગ્ર મામલે ડુંગર પોલીસે હાલ બંને આરોપીની ધરપકડ કરીને આગળની કાયદેસરની કાર્યવાહી હાથ ધરી છે.
