છોટાઉદેપુરમાં ભાજપ પ્રદેશ અધ્યક્ષના આગમન પૂર્વે જ કુદરતનો પ્રકોપ, વિશાળ ડોમમાં મોટું નુકસાન | Chhota Udepur Unseasonal Rain Massive Dome Collapses Ahead of BJP Chief’s Visit
Chhota Udepur News : ગુજરાતના મોટાભાગના વિસ્તારોમાં આજે(19 માર્ચ) ભારે પવન ફૂંકાવવાની સાથે કમોસમી વરસાદ ખાબક્યો છે. જોરદાર પવન ફૂંકાતા ધૂળની ડમરી ઊડી હોવાના અનેક દ્રશ્યો સામે આવ્યા છે. જેમાં છોટાઉદેપુર જિલ્લામાં મોડી સાંજે અચાનક વાતાવરણ પલટાયું હતું અને ભારે પવન સાથે કમોમસી વરસાદ ખાબક્યો હતો.
છોટાઉદેપુરમાં ભારે પવન સાથે માવઠું
છોટાઉદેપુર જિલ્લાના સંખેડા, બોડેલી પંથકમાં મોડી સાંજે આકાશ કાળાડિબાંગ વાદળોથી ઘેરાઈ ગયું હતું અને જોતજોતામાં મિનિ વાવાઝોડું ત્રાટક્યું હતું. જેમાં છોટાઉદેપુર સહિતના વિસ્તારોમાં માવઠું પડ્યું હતું.
બોડેલી સહિતના વિસ્તારોમાં વીજળી ગુલ
પવનની ગતિ એટલી તીવ્ર હતી કે કેટલીક જગ્યાએ વૃક્ષો ધરાશાયી થયા હોવાનું જણાય છે. આમ, ભારે પવન ફૂંકાતા બોડેલી સહિતના વિસ્તારોમાં વીજળી ગુલ થઈ ગઈ હતી.
પ્રદેશ અધ્યક્ષના કાર્યક્રમ પૂર્વે જ તૈયારીઓ પર પાણી ફરી વળ્યું
કુદરતી આફત વચ્ચે છોટાઉદેપુરમાં ભાજપ કાર્યાલય સામે યોજાનારા ભવ્ય કાર્યક્રમ માટે ઉભો કરાયેલો વિશાળ ડોમ પવનના પ્રચંડ ઝપાટામાં કાગળની જેમ ઉડી જતા ભારે અફરાતફરી મચી ગઈ હતી. આમ, પ્રદેશ અધ્યક્ષ જગદીશ વિશ્વકર્માના કાર્યક્રમ પૂર્વે જ તૈયારીઓ પર પાણી ફરી વળ્યું હતું.
ખેડૂતોના પાકને નુકસાન
માત્ર શહેરી જ નહીં, પણ ગ્રામ્ય વિસ્તારોમાં પણ કુદરતે કહેર વર્તાવ્યો છે. કમોસમી વરસાદ અને વંટોળને કારણે ખેતરોમાં ઉભેલા પાકને વ્યાપક નુકસાન થયું છે. ખાસ કરીને મકાઈ અને તુવેર જેવા પાકોમાં પવનને કારણે મોટું નુકસાન થવાની ભીતિ સેવાઈ રહી છે. મોંઘા ભાવના બિયારણ અને મહેનત બાદ તૈયાર થયેલો પાક આડો પડી જતા ધરતીપુત્રોના મોઢે આવેલો કોળિયો છીનવાઈ ગયો હોય તેવી સ્થિતિ સર્જાઈ છે.
