અમદાવાદમાં આર્કિટેક્ટને ઈન્સ્ટાગ્રામ પર લોભામણી જાહેરાત પડી મોંઘી, વધુ નફાની લાલચમાં 1.25 કરોડ ગુમાવ્યા | Architect loses Rs1 crore advertisement fraud on Instagram in Ahmedabad
Ahmedabad News : અમદાવાદમાં શેરબજારના નામે છેતરપિંડીની વધુ એક ચોંકાવનારી ઘટના સામે આવી છે, જેમાં સરખેજનો એક આર્કિટેક યુવક રૂ.1.25 કરોડ ગુમાવી બેઠો છે. બિલ્ડિંગ ડિઝાઇનિંગનું કામ કરતા 38 વર્ષીય યુવકે ઇન્સ્ટાગ્રામ પર રોકાણની એક લોભામણી જાહેરાત જોઈ હતી. આ જાહેરાતના આધારે સંપર્ક કરતા એક અજાણી મહિલાએ તેને વોટ્સએપ ગ્રુપમાં એડ કર્યો હતો, જ્યાં અન્ય સભ્યોના નફાના ખોટા સ્ક્રીનશોટ જોઈને યુવક લાલચમાં આવી ગયો હતો.
અમદાવાદમાં આર્કિટેક્ટને ઈન્સ્ટાગ્રામ પર લોભામણી જાહેરાત પડી મોંઘી
છેતરપિંડીની આ જાળમાં યુવકને ફસાવવા માટે ઠગ ટોળકીએ તેની પાસે એક ખાસ એપ્લિકેશન ડાઉનલોડ કરાવી હતી. આ એપમાં શરૂઆતમાં નફો થતો હોવાનું આભાસી ચિત્ર ઊભું કરવામાં આવ્યું અને IPOમાં રોકાણની લાલચ આપવામાં આવી હતી.
વધુ નફાની લાલચમાં 1.25 કરોડ ગુમાવ્યા
આનાથી પ્રેરાઈને યુવકે માત્ર 20 દિવસના ટૂંકા ગાળામાં પોતાના સગા-સંબંધીઓ અને પરિચિતો પાસેથી નાણાં ઉછીના લઈને કુલ 19 અલગ-અલગ ટ્રાન્ઝેક્શન દ્વારા 1.25 કરોડથી વધુની રકમ જમા કરાવી દીધી હતી.
જ્યારે યુવકે પોતાની રકમ અને થયેલો નફો પરત મેળવવા માટે પૈસા ઉપાડવાનો પ્રયાસ કર્યો, ત્યારે ટેકનિકલ કારણોસર ટ્રાન્ઝેક્શન ફેઈલ થયા હતા. લાખો રૂપિયા ફસાઈ ગયા હોવાનું અને છેતરપિંડી થઈ હોવાનું જણાતા યુવકે તાત્કાલિક સાયબર ક્રાઇમમાં ફરિયાદ નોંધાવી હતી. હાલ પોલીસે આ મામલે ગુનો નોંધીને બેંક ખાતાઓની વિગતો અને ટેકનિકલ પુરાવાઓના આધારે તપાસ હાથ ધરી છે.
