લોકસભાના સ્પીકર ઓમ બિરલા સામે વિપક્ષનો અવિશ્વાસ પ્રસ્તાવ નકારાયો | Opposition’s no confidence motion against Lok Sabha Speaker Om Birla rejected
– અવિશ્વાસ પ્રસ્તાવ લાવવા બદલ ગૃહમંત્રીએ વિપક્ષને ઘેર્યો
– પીએમના વર્તન પર સવાલો ઉઠાવનારા રાહુલ પોતે સંસદમાં ફ્લાઇંગ કિસ આપે કે આંખ મટકાવે છે : અમિત શાહ
નવી દિલ્હી : લોકસભાના અધ્યક્ષ ઓમ બિરલા સામે વિપક્ષ દ્વારા અવિશ્વાસ પ્રસ્તાવ રજુ કરવામાં આવ્યો હતો જેને ધ્વની મત દ્વારા નકારી દેવાયો હતો. આ દરમિયાન વિપક્ષના સાંસદોએ ગૃહમંત્રી અમિત શાહ અને ભાજપ સાંસદ જગદંબીકાપાલ પાસેથી માફીની માગ કરીને ભારે હોબાળો કર્યો હતો. બાદમાં દિવસભર માટે સંસદની કાર્યવાહીને સ્થગિત કરી દેવાઇ હતી.
જોકે આ પહેલા કેન્દ્રીય ગૃહમંત્રી અમિત શાહે વિપક્ષ અને રાહુલ ગાંધી પર આકરા પ્રહારો કર્યા હતા, અમિત શાહે કહ્યું હતું કે બંધારણે લોકસભાના સ્પીકરને મધ્યસ્થતા કરનારા તરીકેની ભૂમિકા સોંપી છે, વિપક્ષ તેમના પર શંકા કરી રહ્યો છે, અમિત શાહના ભાષણ દરમિયાન વિપક્ષના સાંસદોએ ભારે સુત્રોચ્ચાર કર્યા હતા જોકે અમિત શાહે પોતાનું ભાષણ શરૂ રાખ્યું હતું અને રાહુલ ગાંધીને ઘેર્યા હતા.
અમિત શાહે રાહુલ પર પ્રહારો કરતા કહ્યું હતું કે તેઓ ક્યારેક આંખ મટકાવે છે તો ક્યારેક ફ્લાઇંગ કિસ આપે છે. જ્યારે બોલવાની તક આપવામાં આવે ત્યારે રાહુલ ગાંધી જર્મની કે બ્રિટનમાં હોય છે, રાહુલે પોતાના વર્તન પર પણ વાત કરવી જોઇએ વડાપ્રધાન બેઠા હોય તો દોડીને આવીને તેમને ભેટી પડે છે, આવુ ક્યારેય નથી થયું, ક્યારેક ફાઇલિંગ કિસ આપે છે, ક્યારેક આંખ મટકાવે છે ને સવાલ વડાપ્રધાનના વર્તન પર ઉઠાવવા લાગે છે. વિપક્ષના ટોચના નેતા જ આંખ મારે છે. અમિત શાહના આ આરોપોનો વળતો જવાબ આપતા પ્રિયંકા ગાંધીએ કહ્યું હતું કે અવિશ્વાસ પ્રસ્તાવ અધ્યક્ષ ઓમ બિરલા સામે હતો રાહુલ ગાંધી સામે નહીં, ગેરસંસદીય શબ્દનો ઉપયોગ થતા સ્પીકરે કોઇ કાર્યવાહી ના કરી. જ્યારે ગૃહમાં વિપક્ષના સાંસદોએ ભારે હોબાળો કર્યો હતો અને અંતે સંસદની કાર્યવાહીને દિવસભર માટે સ્થગિત કરવી પડી હતી.
