યુદ્ધની ઇફેક્ટ : ગેસ સિલિન્ડરની ડિલિવરી નીતિમાં થયેલા ફેરફારથી ગ્રાહકોની ગેસ એજન્સી ઓફિસે લાંબી કતાર : કાળા બજારીયા સક્રિય | Long queues of customers at gas agency offices due to change in gas cylinder delivery policy
Vadodara : ઈરાન અને અમેરિકા વચ્ચે ચાલી રહેલા યુદ્ધની વિપરીત અસરો શરૂ થઈ ગઇ છે. પરિણામે લિક્વિડ પેટ્રોલિયમ ગેસની તંગી વર્તાઈ રહી છે. જેની સીધી અસર વડોદરામાં જોવા મળી રહી છે ત્યારે ગેસ સિલિન્ડરના ભાવ વધારા સહિત તંત્ર દ્વારા એકાએક પોલીસી બદલી નંખાતા ગેસ સિલિન્ડર મેળવવા માટે પાણી ગેટ વિસ્તારની ગેસ એજન્સી ખાતે મસ મોટી લાંબી લાઈનો લાગી ગઈ છે.
ઉલ્લેખનીય છે કે ઈરાન-ઇઝરાયેલ અને અમેરિકા વચ્ચે ભીષણ યુદ્ધ છેલ્લા દસેક દિવસથી ચાલી રહ્યું છે. પરિણામે ક્રૂડ ઓઇલ અને લિક્વિડ પેટ્રોલિયમ ગેસની આવકમાં ભારે ઘટાડો થયો છે.
પરિણામે આની સીધી અસર લોકો પર પડી છે અને તંત્ર દ્વારા ગેસ સિલિન્ડર પર રાતોરાત રૂપિયા 55નો અને કોમર્શિયલ ગેસનો પણ રૂપિયા 100થી વધારી દેવા ઉપરાંત ગેસ સિલિન્ડર બુક કરાવવાની નીતિ પણ રાતોરાત બદલી દેવામાં આવી છે. મોટાભાગે ઓનલાઇન થતુ સિલિન્ડરનું બુકિંગ યેનકેન લગભગ બંધ જેવું જ થયું છે. આ ઉપરાંત ગેસ સિલિન્ડર નોંધણી માટે અગાઉના સિલિન્ડરથી 25 દિવસ બાદ થઈ શકશે. આ ઉપરાંત અન્ય સિલિન્ડરની નોંધણી પણ ત્યારબાદ જ કરાશે એવો હાલની નીતિમાં ફેરફાર તાત્કાલિક ધોરણે કરી દેવાયો છે.
જેથી કાળા બજારિયાઓને છૂટો દોર મળી જતા ઘરેલુ ગેસનો ભાવ નિયત ભાવથી ઊંચા ભાવે રૂપિયા 1000-1200માં આપતા હોવાની વિગતો પણ ફરતી થઈ ગઈ છે.
દરમિયાન પાણીગેટ વિસ્તારમાં આવેલી ગેસ એજન્સી ખાતે પણ સિલિન્ડર સાથે રાખીને ગ્રાહકો નોંધણી કરાવવા અથવા તો તાત્કાલિક ડિલિવરી લેવા ગેસ એજન્સીની ઓફિસે મસ મોટી લાઈનો વહેલી સવારથી લાગી ગઈ હતી. જ્યારે બીજી બાજુ તંત્ર દ્વારા કહેવાય છે કે ઘરેલુ ગેસની કોઈ અછત નથી અને ગ્રાહકોએ અફવા બજારથી દૂર રહેવા પણ જણાવ્યું હતું.
