વડોદરા એસટી વિભાગે વિદ્યાર્થીઓ માટે 42 નવી ટ્રીપો શરૂ કરી | Vadodara ST Department launches 42 new trips for students
Vadodara GSRTC : વડોદરા શહેરમાંથી રોજિંદી એસટી બસ દ્વારા મુસાફરી કરતા વિદ્યાર્થીઓ અને અન્ય મુસાફરોની વધતી સંખ્યાને ધ્યાનમાં રાખીને વડોદરા એસટી વિભાગે મહત્વપૂર્ણ નિર્ણય લીધો છે.
વિવિધ રૂટ પર વધતી ભીડ અને મુસાફરોની લાંબા સમયથી ઉઠતી માંગને ધ્યાનમાં રાખીને એસટી તંત્ર દ્વારા ખાસ કરીને વિદ્યાર્થી વર્ગને અનુકૂળ પડે તે માટે અલગ અલગ રૂટ પર કુલ 42 નવી ટ્રીપો શરૂ કરવામાં આવી છે.
એસટી વિભાગ દ્વારા શરૂ કરાયેલી આ નવી ટ્રીપોના કારણે કોલેજ અને શાળામાં આવનજાવન કરતા વિદ્યાર્થીઓને નોંધપાત્ર રાહત મળી છે. અગાઉ કેટલીક રૂટ પર બસોની અછતને કારણે વિદ્યાર્થીઓને ઉભા રહીને મુસાફરી કરવી પડતી હતી અથવા મોડું પહોંચવું પડતું હતું. હવે નવી ટ્રીપો શરૂ થતા મુસાફરી વધુ સરળ બની છે.
આ ઉપરાંત વડોદરા એસટી વિભાગ દ્વારા મુસાફરોને વધુ સારી સુવિધા આપવા માટે કેટલાક નવા એક્સપ્રેસ શિડ્યુલ પણ શરૂ કરવામાં આવ્યા છે. આ નવા એક્સપ્રેસ રૂટમાં વડોદરાથી રાધનપુર, ડીસા, થરાદ, પાદરા, માતાનો મઢ, સાવલી, અંબાજી, ડભોઇ અને બોટાદ જેવા મહત્વપૂર્ણ સ્થળોનો સમાવેશ કરવામાં આવ્યો છે.
