18000 કરોડના બજેટના બણગાં, AMCની તિજોરી તો ખાલી, સરકાર પાસે પૈસાના ફાંફા! | Ahmedabad Municipal Corporation Faces Cash Crunch Despite ₹18 000 Crore Budget
AMC Budget 2026: વાર્ષિક 18,518 કરોડ રૂપિયાનું બજેટ ધરાવતા અમદાવાદ મ્યુનિસિપલ કોર્પોરેશન તંત્રમાં ફરજ બજાવતા અધિકારીઓ અને શાસકો કોર્પોરેશનના નાના કે મોટા પ્રોજેકટ માટે પણ રાજય સરકાર આધારીત બની ગયા છે. 1200 કરોડ રૂપિયાથી વધુની રકમના ખર્ચે ખારીકટ રીડેવલપમેન્ટ પ્રોજેકટની કામગીરી શરૂ કરાઈ હતી. હવે જાસપુર ગામ પાસે 250 એમ.એલ.ડી.ક્ષમતાનો વોટર ટ્રીટમેન્ટ પ્લાન્ટ બનાવવા અને પાંચ વર્ષના ઓપરેશન અને મેઈન્ટેનન્સ માટે આપવા 203 કરોડ રૂપિયાની ગ્રાન્ટ ફાળવવા પણ અર્બન ડેવલપમેન્ટ મિશનના અધિક મુખ્ય કારોબારી અધિકારીને લેખિત રજૂઆત કરવી પડે છે. કોર્પોરેશનના સૂત્રોના કહેવા પ્રમાણે, રાજ્ય સરકાર ડી.પી.આર.મંજૂર કરે પછી જ ટેન્ડર કરી શકાય છે.
મ્યુનિસિપલ કોર્પોરેશનના બજેટનુ કદ સતત વધતુ જ ગયુ
સ્થાનિક સ્વરાજયની સંસ્થા ગણાતા અમદાવાદ મ્યુનિસિપલ કોર્પોરેશનની પ્રોપર્ટી ટેકસની વાર્ષિક આવક બધુ મળીને 2250 કરોડ રૂપિયાની આસપાસ રહેતી હોય છે. છેલ્લા કેટલાક વર્ષોથી પ્રોપર્ટી ટેકસ, પાણી કે અન્ય ટેકસમા કોઈ વધારો કરવામા આવ્યો નથી. કહેવત છે કે, જેટલી ચાદર હોય એટલી જ સોડ તાણવી જોઈએ. આ બાબત સારી રીતે જાણવા છતાં મ્યુનિસિપલ કોર્પોરેશનના બજેટનુ કદ સતત વધતુ જ ગયુ. પહેલા બાર હજાર, પછી પંદર હજાર અને હવે અઢાર હજાર કરોડથી પણ વધુ.
વિકાસના નામે જે જાહેરાતો કરાઈ એની સામે પરિસ્થિતિ એવી આવી ગઈ છે કે, રોડ નવા બનાવવા હોય,રીસરફેસ કરવા હોય તો પણ રાજય સરકાર ગ્રાન્ટ ફાળવે ત્યાં સુધી રાહ જોવી પડે છે.જાસપુર ગામમા સરકારની માલિકીની ૫૬૩૬૧ ચોરસમીટર જમીનમા નવો વોટર ટ્રીટમેન્ટ પ્લાન્ટ બનાવવા 203.85 કરોડ રૂપિયા ગ્રાન્ટ ફાળવવા માટે પણ જો મ્યુનિસિપલ કમિશનરને પત્ર લખી રજૂઆત કરવી પડતી હોય તો કઈ રીતે આ શહેરને સ્માર્ટ શહેર ગણી શકાય તેવી ચર્ચા લોકોમાં ચાલી રહી છે.
