ગુજરાતે ગરમી પકડીઃ 8 સ્થળે 38 સે. માર્ચમાં સામાન્યથી વધુ તાપ જ પડશે | Gujarat heats up: 38 C in 8 places Temperatures will be above normal in March
સપ્તાહ દરમિયાન 39-40 સે.મહત્તમ તાપમાનની આગાહી : રાજકોટ, અમરેલી, ભાવનગર, મહુવા, કેશોદ, અમદાવાદ, સુરેન્દ્રનગર, કંડલા 38 સે., ગાંધીનગર, વડોદરા, દિવ, પોરબંદરમાં પણ 37 સે.
રાજકોટ, : માર્ચ માસ અને ઉનાળાના આરંભ સાથે જ ગુજરાત ગરમી પકડી રહ્યું છે એટલે કે વધતું તાપમાન મુક્ત થવાને બદલે ગ્રીનરીના અભાવ અને સીમેન્ટ કોંક્રિટના જંગલ વચ્ચે ગ્રીન હાઉસ ઈફેક્ટના પગલે ક્રમશઃ વધી રહ્યું છે. આજે રાજ્યમાં 8 સ્થળોએ પારો 38 સે.એ પહોંચી ગયો હતો અને આવતીકાલે કાંઠાળ વિસ્તારોના 9 સ્થળોએ ગરમીનું યલો એલર્ટ જારી થયું છે.
મોસમ વિભાગના આજે જારી થયેલા પૂર્વાનુમાન મૂજબ આગામી 19 માર્ચ સુધી એકંદરે રાજ્યમાં તાપમાન માર્ચના આ સમયમાં સામાન્ય હોય તેના કરતા વધુ રહેશે. આજે પણ નોર્મલથી 4થી 5 સે.વધુ તાપમાન રહ્યું છે. આગામી એક સપ્તાહ સુધી રાજકોટ, અમદાવાદ, વડોદરા, સુરત સહિત મોટાભાગના સ્થળોએ મહત્તમ તાપમાન 39થી 40 સે.રહેવાની સંભાવના છે.
આજે રાજ્યમાં સર્વાધિક તાપમાન ભાવનગરમાં 38 સે. તથા અમદાવાદ, સુરેન્દ્રનગર, રાજકોટ, અમરેલી, મહુવા, કેશોદ અને કંડલામાં નગણ્ય ફરક સાથે પારો 38 સે.એ પહોંચ્યો હતો જ્યારે ગાંધીનગર, વડોદરા, દિવ, પોરબંદરમાં પણ 37 સે., જ્યારે સુરત, વલ્લભવિદ્યાનગર, 36 અને ભૂજમાં 35.4 સે. તાપમાન નોંધાયું છે.
આ સાથે એ.સી.,પંખા ધમધમતા થતા વિજમાંગ અને સાથે પાણીની માંગમાં પણ ક્રમશઃ વધારો થઈ રહ્યો છે. વેસ્ટર્ન ડિસ્ટર્બન્સ હજુ જારી છે અને છૂટીછવાઈ બરફવર્ષાના હવામાન વચ્ચે જ આટલી ગરમી પડી રહી છે. મોસમ વિભાગ અનુસાર ગુજરાતમાં આગામી બે દિવસ તાપમાન 2થી 3 સે. ઘટશે પરંતુ, બે દિવસ બાદ ફરી તે એટલું વધી જશે.
