છોટા ઉદેપુરમાં ‘ભંગુરિયા મેળા’ સાથે હોળીના પર્વનો પ્રારંભ, ઢોલના ધબકારે આદિવાસી સંસ્કૃતિનો અનોખો મહેરામણ | Bhungariya Mela Marks Grand Start of Holi Festival in Chhota Udepur
Bhungariya Mela In Chhota Udepur: આદિવાસી સમાજનો સૌથી મોટો અને રંગબેરંગી તહેવાર એટલે હોળી. હોળી પહેલા યોજાતા ભંગુરિયો મેળાથી લઈને ચુલના મેળા અને ત્યાર બાદ 15 દિવસ સુધી ચાલતા ગેરના મેળા આદિવાસી સમાજમાં ઉત્સાહ અને પરંપરાનો અનોખો મેળાપ જોવા મળે છે. આજે (પહેલી માર્ચ) છોટા ઉદેપુર ખાતે ભવ્ય ભંગુરિયો મેળો યોજાયો, જેમાં હજારોની સંખ્યામાં લોકો જોડાયા.
પરંપરા અને આધુનિકતાનો સંગમ
હોળી પૂર્વે હાટ બજારોમાં યોજાતા ભંગુરિયો મેળા આદિવાસી સંસ્કૃતિનું જીવંત પ્રતિબિંબ છે. ઢોલ-નગારાના તાલે યુવાનો અને વડીલો રંગબેરંગી પરંપરાગત વેશભૂષામાં ઉમંગભેર નાચતા જોવા મળ્યા. હોળી માટેની ખરીદી સાથે સાથે આ મેળા સામાજિક મિલન અને આનંદનો અવસર પણ બની રહે છે. અલગ અલગ વિસ્તારોમાં રહેતા લોકો જ્યાં પણ રહેતા હોય તે ભંગુરિયો મેળો યોજાય ત્યાં ભેગા થતા હોય છે. આ મેળાને નિહાળવા માટે દેશ ભારમાં તો ઠીક વિદેશ માંથી પણ લોકો અહીં આવતા હોય છે, જે આદિવાસી લોકોની પરંપરા અને મેળાઓને નિહાળી પ્રભાવિત બનતા હોય છે.
ભંગુરિયો મેળા બાદ હોળી પ્રગટાવી ચૂલના મેળા અને ત્યારબાદ ગેરના મેળા 15 દિવસ સુધી વિવિધ ગામોમાં ઉજવાય છે. આ દરમિયાન આદિવાસી સમાજ પોતાના લોકનૃત્ય, ગીતો અને અનોખી પરંપરાઓ દ્વારા સાંસ્કૃતિક વારસાને જીવંત રાખે છે. દરેક ગામમાં ઉત્સવમય માહોલ છવાઈ જાય છે.
નેતાઓ પણ ઢોલના તાલે ઝૂમ્યા
આજના ભંગુરીયા મેળામાં સાંસદ જશુભાઈ રાઠવા ખાસ હાજર રહ્યા. તેઓ ભાજપના જિલ્લા પ્રમુખ અને કાર્યકરો સાથે ઢોલના તાલે નાચતા જોવા મળ્યા. મેળામાં ઉપસ્થિત લોકોએ તેમને ખભા પર બેસાડી ઉત્સાહપૂર્વક નચાવ્યા, જે મેળાનો મુખ્ય આકર્ષણ કેન્દ્ર બન્યું હતું.
આ રીતે ભંગુરિયો મેળા સાથે હોળીના પર્વની શરૂઆત થઈ ચૂકી છે. અને આગામી દિવસોમાં ચુલ અને ગેરના મેળાઓ સાથે સમગ્ર વિસ્તાર ઉત્સવમય બનશે.
