નડિયાદની પીપલગ ચોકડી પાસે પાર્ટી પ્લોટના હોલમાં ભીષણ આગ લાગી | A massive fire broke out in the hall of a party plot near Pipalg Chowkdi in Nadiad
– શોર્ટસર્કિટથી આગ લાગી હોવાની આશંકા
– પૂંઠાના જથ્થા અને અન્ય ચીજવસ્તુઓ સંગ્રહ કરેલી હોવાથી આગે વિકરાળ સ્વરૂપ ધારણ કરતા ફાયર બ્રિગ્રેડ કાબુ મેળવ્યો
નડિયાદ : નડિયાદ શહેરનાપીપલગ ચોકડી વિસ્તારમાં આવેલા રિયા પાર્ટી પ્લોટના હોલમાં શુક્રવારે બપોરે અચાનક ભીષણ આગ લાગતા અફરાતફરી મચી ગઈ હતી, જેમાં હોલમાં રહેલો પૂંઠાનો જથ્થો બળીને ખાખ થઈ ગયો હતો.
નડિયાદના પીપલગ ચોકડી પાસે આવેલા રિયા પાર્ટી પ્લોટના હોલના ભાગમાં આજે બપોરના સમયે કોઈ કારણોસર અચાનક આગ ફાટી નીકળી હતી. હોલમાં રહેલો મોટા પ્રમાણમાં પૂંઠા અને અન્ય જ્વલનશીલ ચીજવસ્તુઓનો સંગ્રહ કરવામાં આવ્યો હોવાથી આગે જોતજોતામાં વિકરાળ સ્વરૂપ ધારણ કરી લીધું હતું. આગની જ્વાળાઓ એટલી તીવ્ર હતી કે ધુમાડાના કાળા ડિબાંગ ગોટેગોટા દૂર દૂર સુધી આકાશમાં જોવા મળ્યા હતા. જેને પગલે આસપાસના રહીશો અને હાઈવે પરથી પસાર થતા વાહનચાલકોમાં ભારે કુતૂહલ અને ભયનો માહોલ સર્જાયો હતો. ઘટનાની જાણ થતા જ સ્થાનિક લોકો મોટી સંખ્યામાં ઉમટી પડયા હતા અને નડિયાદ ફાયર બ્રિગેડને તાત્કાલિક જાણ કરવામાં આવી હતી. બનાવની ગંભીરતાને જોતા ફાયર વિભાગની ટીમ ૨ ફાયર ફાઇટરે આગ પર કાબૂ મેળવવા માટે પાણીનો મારો ચલાવ્યો હતો.
હોલની દીવાલો કાચની હોવાથી અને અંદર મોટા પાયે ડેકોરેશનની વસ્તુઓ હોવાને કારણે આગ ખૂબ જ ઝડપથી પ્રસરી હોવાનું પ્રાથમિક તપાસમાં બહાર આવ્યું છે. આગને કારણે હોલના ફનચર, કાચ અને અન્ય કિંમતી સામાનને મોટું નુકસાન થયું છે. આગ લાગવાનું સચોટ કારણ હજુ સુધી જાણી શકાયું નથી. પરંતુ ગરમી અથવા શોર્ટસકટને કારણે દુર્ઘટના બની હોવાની આશંકા સેવાઈ રહી છે. નડિયાદ પોલીસનો કાફલો પણ ઘટનાસ્થળે પહોંચી ગયો હતો અને પરિસ્થિતિ પર કાબૂ મેળવ્યો હતો.
