સ્માર્ટ સિટી અમદાવાદમાં સરકારી બસમાંથી 100 લિટર ડીઝલની ચોરી, પોલીસ પેટ્રોલિંગના દાવા પોકળ | Ahmedabad News 100 liters of diesel stolen from government ST bus Ahmedabad Police
Ahmedabad News: છેલ્લા કેટલાક દિવસથી અમદાવાદમાં ચોરીની ઘટનાામાં વધારો થઈ રહ્યો છે. હવે બોપલમાં આવેલા લાલગેબી આશ્રમના કમ્પાઉન્ડમાં પાર્ક કરેલી ST બસને તસ્કરોએ નિશાન બનાવી છે. અહીં પાર્ક કરેલી ST બસમાંથી તસ્કરો 100 લિટર જેટલું ડીઝલ ચોરી કરીને ફરાર થઈ ગયા છે. આ ઘટના અંગે બસના ડ્રાઈવરે ફરિયાદ નોંધાવતા પોલીસે તપાસ હાથ ધરી છે.
રાત્રિ રોકાણ માટે બસ પાર્ક કરી હતી
ST ડ્રાઈવર પરસોત્તમકુમાર બારીયાએ આ ડીઝલ ચોરી અંગે પોલીસ ફરિયાદ નોંધાવી છે. જે મુજબ, ગત તારીખ 21 ફેબ્રુઆરીએ તેઓ સુરત-અમદાવાદ-બોપલ રૂટની બસ લઈને આવ્યા હતા. તેમણે રાત્રિ રોકાણ માટે લાલગેબી આશ્રમ ખાતે બસ પાર્ક કરી હતી. આ પછી તેઓ અહીં જ એક ઓટલા પર સૂઈ ગયા હતા અને ગાઢ નિદ્રામાં હતા.
ટાંકીનું ઢાંકણ તૂટેલું દેખાયું
જે બાદ વહેલી સવારે તેઓ બસ ઉપાડવા માટે જાગ્યા ત્યારે ટાંકીનું ઢાંકણ તૂટેલું જોવા મળ્યું હતું. જે બાદ બસમાં ડીઝલનો કાંટો પણ ઓછો બતાવતા જાણવા મળ્યું હતું કે, તસ્કરો ડીઝલ ટાંકી અને સેન્સરનું ઢાંકણ તોડી ટાંકીમાંથી 100 લિટર ડીઝલ ચોરી ગયા છે. આ ઘટના અંગે ડ્રાઈવર અને કંડક્ટરે સાણંદ ડેપો અને સુરતની કચેરીએ જાણ કરી હતી. જે બાદ તેમણે પોલીસ ફરિયાદ નોંધાવી હતી.
આ પણ વાંચો: ગુજરાતના મોટાભાગના જિલ્લામાં પાસપોર્ટ-પોસ્ટ ઓફિસને બોમ્બથી ઉડાવી દેવાની ધમકી
પોલીસની ઢીલી નીતિ કારણ?
આ ઘટના પરથી એક વાત સ્પષ્ટ છે કે અમદાવાદ જેવા સ્માર્ટ સીટીમાં જ્યાં 24 કલાક પોલીસ પેટ્રોલિંગના દાવા થઈ રહ્યા છે. શહેરના દરેક ખૂણે ખાંચકે CCTVનો પહેરો છે તેમ છતાં ચોરો પોલીસને પડકાર ફેંકી સરળતાથી કોઈ ડર વગર ચોરી અને લૂંટની ઘટનાને અંજામ આપી રહ્યા છે. ક્યાંકને ક્યાંક પોલીસ જે નાની-નાની ચોરીની ઘટનાઓને અવગણી રહી છે તેનું જ આ પરિણામ હોઈ શકે.
