યુકેમાં ડિજિટલ ટ્રાન્ઝિટ સિસ્ટમ અમલી બનતા ભારતીયો માટે ઇ-વીઝા ફરજિયાત | E visa mandatory for Indians as digital transit system comes into effect in UK
– નવા નિયમો ગુરૂવારથી અમલમાં પણ બાયોમેટ્રિક રજિસ્ટ્રેશન કરાવવા જાતે જ જવું પડશે
– જે મુલાકાતીઓ માટે વીઝા જરૂરી ન હોય તેમના માટે ઇલેકટ્રોનિક ટ્રાવેલ ઓથોરાઇઝેશન ફરજિયાત બન્યું
લંડન : યુકેમાં બુધવારથી નવી ડિજિટલ ટ્રાન્ઝિટ સિસ્ટમ અમલી બનવા સાથે નવા નિયમો અમલમાં આવતાં હવે ભારતીય પ્રવાસીઓએ ફરજિયાત ઇવીઝા મેળવવાના રહેશે જ્યારે જે લોકોને યુકેમાં પ્રવાસ કરવા વીઝાની જરૂર ન હોય તેમણે ફરજિયાત ઇલેકટ્રોનિક ટ્રાવેલ ઓથોરાઇઝેશન-ઇટીએ- કરાવવું પડશે. નવા નિયમો અમલમાં આવવા સાથે જે પ્રવાસીઓ પાસે જરૂરી પ્રવાસ દસ્તાવેજો ન હોય તેમને એરલાઇન્સ વિમાનમાં બેસતાં અટકાવી શકશે. યુકે સરકારે ગયા વર્ષે તબક્કાવાર શરૂ કરેલી ઇવીઝા સિસ્ટમ બુધવારથી સંપૂર્ણપણે અમલી બની ગઇ છે.
તત્કાળ અમલમાં આવે એ રીતે લાગુ પડનારા આ ફેરફાર અનુસાર કાગળ આધારિત વીઝા સ્ટિકર્સનું સ્થાન ઇવીઝા લેશે. જો કે, નવી સિસ્ટમમાં બાયોમેટ્રિક રજિસ્ટ્રેશન કરાવવા માટે તો અરજદારે જાતે જ એપ્લિકેશન સેન્ટરમાં જવું પડશે. તેમાં હવે પ્રોસેસિંગ સમયગાળામાં પાસપોર્ટ મુકીને જવાની જરૂર નથી. યુકેના સ્થળાંતર અને નાગરિકતા વિભાગના પ્રધાન માઇક ટેપે જણાવ્યું હતું કે યુકેમાં પ્રવાસ કરવા માંગતા દરેક જણને હું તેમનો પ્રવાસ સરળ નીવડે તે માટે યોગ્ય પરમિશન લેવાની વિનંતી કરૂ છું.
યુકે બોર્ડર એન્ડ માઇગ્રેશન સિસ્ટમને સંપૂર્ણપણે ડિજિટાઇઝ કરવાની યોજનાના ભાગરૂપે જે લોકો ફિઝિકલ બાયોમેટ્રિક રેસિડેન્સ પરમીટ-બીઆરપી-વીઝા સ્ટિકર્સ ધરાવતો પાસપોર્ટ કે શાહીનો સ્ટેમ્પ કે બાયોમેટ્રિક રેસિડેન્સ કાર્ડને હવે સમગ્રપણે ઓનલાઇન યુકે વીઝા એન્ડ ઇમિગ્રેશન સિસ્ટમ પર લઇ જવામાં આવ્યા છે. કાગળના દસ્તાવેજોને વર્ષો સુધી તબક્કાવાર દૂર કરી તેને સ્થાને ઇવીઝા અમલમાં મુકવામાં આવ્યા છે. અત્યાર સુધીમાં એક કરોડ કરતાં વધારે ઇવીઝા જારી કરવામાં આવ્યા છે.
મહત્વની બાબત એ છે કે જે પ્રવાસીઓ કનેક્ટિંગ ફલાઇટ્સ લેવા માંગતા હોય તેમના માટે પણ ઇટીએ ફરજિયાત છે. તેમણે પાસપોર્ટ કન્ટ્રોલમાંથી પસાર થવાનું રહેશે. સત્તાવાર ડેટા અનુસાર ઓક્ટોબર ૨૦૨૩માં ઇટીએ અમલી બની ત્યારથી ૧૯ મિલિયન પ્રવાસીઓએ સફળતાપૂર્વક તે મેળવવાની અરજી કરી છે અને તેના દ્વારા ૩૮૩ મિલિયન પાઉન્ડની રેવન્યુ પણ થઇ છે. ગુરૂવારથી સર્ટિફિકેટ ઓફ એન્ટાઇટલમેન્ટ ડિજિટલ ફોર્મેટમાં જારી કરાશે. તેને માટે એક જ વાર અરજી કરવાની રહેશે, પાસપોર્ટની મુદત પુરી થાય એટલે તેને માટે ફરી અરજી કરવાની રહેશે નહીં. યુકે ઇટીએ એપ દ્વારા અરજી કરવાનું સરળ અને ઝડપી છે. મોટાભાગના અરજદારોને મિનિટોમાં જ આપોઆપ નિર્ણયની જાણ કરી દેવામાં આવે છે. જેને કારણે તત્કાળ યુકેનો પ્રવાસ કરવાનું શક્ય બન્યું છે. જો કે, સાવચેતી ખાતર અરજદારોને તેમની અરજીના નિકાલ માટે ત્રણ દિવસનો સમય રાખવાનું જણાવાયું છે. ઇટીએ અરજદારે બાયોગ્રાફિક અને બાયોમેટ્રિક વિગતો આપવા ઉપરાંત યોગ્યતા અને અપરાધવિષયક સવાલોના જવાબ આપવાના રહેશે. એ પછી ઓથોરાઇઝેશનને તેમના પાસપોર્ટ સાથે ડિજિટલી લિન્ક કરવામાં આવશે.
યુએસ, કેનેડા અને ફ્રાન્સ સહિત જે ૮૫ દેશોના નાગરિકોને યુકેમાં પ્રવાસ કરવા વીઝાની જરૂર નથી તેમણે પણ હવે કાનુની રીતે ઇટીએ મેળવવા પડશે. ૧૬ પાઉન્ડની ફી ચૂકવી મેળવી શકાતાં ઇટીએની મુદત બે વર્ષનીઅથવા પાસપોર્ટની મુદત સુધીની-બેમાંથી જેની મુદત વહેલી પુરી થતી હોય તેટલી રહેશે. ઇટીએ દ્વારા એકથી વધારે વખત પ્રવાસ કરી શકાય છે. પ્રધાન માઇક ટેપે જણાવ્યું હતું કે યુકેની સરહદ સુરક્ષાને મજબૂત બનાવવા અને પ્રવાસીઓ તથા બિટિશ પ્રજાને આધુનિક અને બહેતર સેવા પુરી પાડવા ઇટીએ સ્કીમ મહત્વની છે. યુએસની આવી જ સેવા માટે ૪૦ ડોલર્સ અને યુરોપિયન યુનિયનની આવી ભાવિ સેવા માટે ૨૦ યુરો વસૂલાશે તેની સરખામણીમાં યુકેની આ સેવા કિફાયતી છે.
