જામનગર પીજીવીસીએલ વર્તુળ કચેરી દ્વારા હાલારના જામનગર અને દેવભૂમિ દ્વારકા જિલ્લામાં 25 ફેબ્રુઆરીએ ડિશ-કનેક્શન ડ્રાઈવ યોજાશે | Jamnagar PGVCL Office will organize dish connection drive on February 25 in Jamnagar and Dwarka
જામનગર પીજીવીસીએલ વર્તુળ કચેરી દ્વારા હાલારના જામનગર અને દેવભૂમિ દ્વારકા જિલ્લામાં આગામી 25 ફેબ્રુઆરીએ ડિશ-કનેક્શન ડ્રાઈવ રાખવામાં આવી છે. અને આ દિવસે માત્ર ડિશ કનેક્શનની કાર્યવાહી થશે. જ્યારે સ્થળ પર પેમેન્ટ સ્વિકારવામાં આવશે નહિ, જેથી વિજ જોડાણ કટ થાય તે પહેલાં બાકી રોકાતા વિજ બિલના નાણાં ભરી દેવા અનુરોધ કરાયો છે.
જામનગરની પીજીવીસીએલ વર્તુળ કચેરી હેઠળના જામનગર જીલ્લા તથા દેવભૂમી દ્વારકા જીલ્લામાં આગામી તા. 25.02.2026ના રોજ તમામ સબ ડીવીઝન ઓફિસોમાં મેગા ડીસ-કનેકશન ડ્રાઈવનું આયોજન કરવામાં આવ્યું છે. આ મેગા ડીસ-કનેકશન ડ્રાઈવ દરમ્યાન ડિફોલ્ટર વિજ ગ્રાહકોના વીજ જોડાણોને ફક્ત ડીસ કનેકશન જ કરવામાં આવશે. સ્થળ પર વીજ બીલના નાણાં સ્વીકારવામાં આવશે નહીં. બાકી બીલના નાણાં સબ ડીવીઝન ઓફિસ પર આવીને 100 ટકા બીલની રકમ ભરપાઈ કરવાની રહેશે. તેમજ નિયમ અનુસાર રી-કનેકશન ચાર્જ વસૂલીને ત્યાર પછી વીજજોડાણ ચાલુ કરવામાં આવશે.
આથી જેના વિજ બિલ ના નાણાં બાકી રહેતા હોય તેઓએ તાત્કાલીક ધોરણે તા. 25.02.2026 પહેલાં નાણા ભરપાઈ કરવા અપીલ કરવામાં આવી છે, જેથી પાવર બંધ થવાથી થતી તકલીફ તેમજ વધારાના ભરવા પડતા ચાર્જ માથી મુક્ત રહી શકાય.
ઉપરાંત વીજ બીલના નાણાની કેશલેસ ચુકવણી કરવા અંગે કંપની દ્વારા પૂરા પાડવામાં આવેલા વિવિધ માધ્યમોથી પણ ગ્રાહકો વીજ બીલની ચુકવણી કરી શકે છે જેમ કે, (1) ઈ.સી.એસ., (2) ડેબીટ કાર્ડ/ક્રેડીટ કાર્ડ (કંપનીની વેબસાઇટ WWW.PGVCL.COM (3)પીજીવીસીએલની પેટાવિભાગીય કચેરી ખાતેના પી.ઓ.એસ. મશીન દ્વારા, (4) કંપનીની વેબસાઇટ WWW.PGVCL.COM મારફત યૂ. પી.આઈ. મોડથી, (5) ઇન્સ્ટા પેમેન્ટ/ઈ-વોલેટ, (6) ગ્રાહકોની સંલગ્ન બેંકની વેબસાઇટ મારફત, (7) બેન્ક ના એ.ટી.એમ. મશીન, (8) આર.ટી.જી.એસ. ના માધ્યમ વડે ભરી શકાશે.
