પશ્વિમ રેલવેમાં પ્રથમવાર હવે ડ્રોન આધારિત લાઈવ -લાઈન ઓ.એચ.ઈ. મોનિટરિંગ કરાશે | For the first time drone based monitoring will now be done in Western Railways
પશ્વિમ રેલવેના વડોદરા વિભાગ દ્વારા પ્રતાપનગર યાર્ડ ખાતે ડ્રોન આધારિત લાઈવ -લાઇન ઓવરહેડ ઇક્વિપમેન્ટ (ઓ.એચ.ઇ.) મોનિટરિંગ અને નિરીક્ષણ પ્રણાલીનું સફળ પરીક્ષણ કરાયું હતું.
આ પહેલ વડોદરા વિભાગના ડિવિઝનલ રેલવે મેનેજર રાજુભડકેના માર્ગદર્શન હેઠળ કર્ષણ વિતરણ(ટ્રેક્શન) વિભાગ દ્વારા અમલમાં મુકાઈ છે. જનસંપર્ક અધિકારીના જણાવ્યા મુજબ, આ આધુનિક ડ્રોન પ્રણાલી દ્વારા રેલવે ટ્રાફિકને અસર કર્યા વિના ઓ.એચ.ઇ.નું નિરીક્ષણ શક્ય બનશે. ડ્રોનમાં થર્મલ કેમેરા હોઈ જે ઓવરહીટિંગ, ઢીલા સંપર્ક, એલાઈનમેન્ટ ખામી તથા અન્ય સંભવિત ટેકનિકલ ત્રુટિઓની નજીક પહોંચી ચોક્કસ ઓળખ કરી શકે છે.
ડ્રોનની માઈક્રો ઓપરેશન રેન્જ અંદાજે પ કિ.મી. અને બેટરી બેકઅપ આશરે ૪૦ મિનિટ છે. થર્મલ ઇમેજિંગ ટેકનોલોજીથી એવી ખામીઓ પણ શોધી શકાશે, જે સામાન્ય દૃષ્ટિથી નિરીક્ષણ દરમિયાન નજરે ચડતી નથી.અગાઉ પ્લેટફોર્મ ખાતેના થર્મલ સેન્સર કેમેરાથી મોનિટરિંગ થતું હતું. ડ્રોન થકી નિરીક્ષણ વધુ સ્પષ્ટ થશે. પરિક્ષણ સફળ રહેતા તેનું અમલીકરણની પ્રક્રિયા હાથ ધરાઈ છે.
