દંતાલીમાં પાવર ઓફ એટર્નીનો દૂરઉપયોગ કરીને જમીનનો દસ્તાવેજ કરી દેવાયો | Land document was made through misuse of power of attorney in Dantali

ખેડૂતોએ જમીન જૂની શરત કરવા પાવર આપ્યો હતો

જમીન વેચી દીધા બાદ હવે બે શખ્સો દ્વારા લીટીગેશન ઊભા કરવામાં આવતા ભાંડો ફૂટયો ઃ ગુનો દાખલ

ગાંધીનગર :  ગાંધીનગરના દંતાલી ગામની કરોડોની કિંમતની જમીન હડપવા તથા
તેમાં વિવાદ ઉભો કરવાના ઈરાદે ખેડૂતોની જાણ બહાર પાવર ઓફ એટર્નીનો ખોટો ઉપયોગ કરી
દસ્તાવેજો બનાવી લેવાના કૌભાંડનો પર્દાફાશ થયો છે. આ મામલે અડાલજ પોલીસ સ્ટેશનમાં
બે શખ્સો વિરુદ્ધ છેતરપિંડી અને વિશ્વાસઘાતની કલમો હેઠળ ગુનો દાખલ કરવામાં આવ્યો
છે.

ગાંધીનગર જિલ્લામાં જમીન સંબંધિત છેતરપિંડી ઘટનાઓ વધી રહી
છે ત્યારે આ વખતે ખેડૂતોની જાણ બહાર તેમના પાવરનો ઉપયોગ કરીને બારોબાર દસ્તાવેજ
કરી લેવાનો મામલો બહાર આવ્યો છે. જે સંદર્ભ પોલીસ સૂત્રોમાંથી મળતી વિગતે પ્રમાણે
અમદાવાદના સોલા ખાતે રહેતા અને જમીન લે વેચનું કામ કરતા જીગર રામભાઈ પટેલ દ્વારા
ફરિયાદ નોંધાવવામાં આવી હતી કે,
દંતાલી ગામના સર્વે નંબર ૨૩૧ વાળી ૮૬૦૦ ચો.મી. જમીન નવી શરતની હોવાથી તેને
જૂની શરતમાં ફેરવવાની કામગીરી માટે ખેડૂતોએ વર્ષ ૨૦૧૬માં કલોલના ભાદોલ ગામના
જયંતીભાઈ અંબાલાલ પટેલ અને મયુર બળદેવભાઈ પટેલને નોટરાઈઝ પાવર ઓફ એટર્ની કરી આપ્યો
હતો. બીજી બાજુ જીગ્નેશભાઈ અને તેમના ભાગીદારોએ ખેડૂતો સાથે મળી કલેક્ટર કચેરીની
કાયદેસરની કાર્યવાહી પૂર્ણ કરી જમીન જૂની શરતમાં ફેરવી હતી અને વર્ષ ૨૦૨૨માં
કાયદેસરનો વેચાણ દસ્તાવેજ કરી જમીનનો કબજો મેળવ્યો હતો. આ બાબતની જાણ હોવા છતાં, જયંતીભાઈ અને
મયુરે વર્ષ ૨૦૧૬ના જૂના પાવરના આધારે વર્ષ ૨૦૨૦માં ખેડૂતોની જાણ બહાર બાનાખત ઊભું
કર્યું હતું અને ત્યારબાદ ફેબ્આરી ૨૦૨૨માં એકબીજાના નામે રજીસ્ટર વેચાણ દસ્તાવેજ
કરી નાખ્યો હતો. ખેડૂતોને કોઈ પણ પ્રકારનો અવેજ ચૂકવ્યા વગર માત્ર લીટીગેશન ઉભું
કરવાના ઈરાદે આ છેતરપિંડી આચરવામાં આવી હોવાનું બહાર આવ્યું હતું. જેથી આ સંદર્ભે
હાલ અડાલજ પોલીસ દ્વારા બંને સામે ગુનો દાખલ કરીને તપાસ શરૃ કરવામાં આવી છે.