આજે વેલેન્ટાઈન્સ ડે પર ‘પ્રેમાત્મક’ કિસ્સા! 354 પતિ-પત્ની દ્વારા એકબીજાને કિડનીનું દાન | Valentine’s Day Special: 354 Couples in Gujarat Donated Kidneys to Their Spouses in 5 Years
Valentine Day Special: ઈ. સ. પૂર્વે 269માં ક્લોડિયસ બીજાના હૂકમથી બલિવેદી પર ચડેલા સંત વેલેન્ટાઈનનો સ્મૃતિદિન 14મી ફેબુ્રઆરી ‘વેલેન્ટાઇન્સ ડે’ તરીકે સમગ્ર વિશ્વમાં મહકેવાનો શરૂ થયો. પ્રેમ-ઇશ્ક-મોહબ્બત-લવ એટલે શું ? એવા સવાલનો એકમાત્ર જવાબ એવો છે કે સુગંધને જો શબ્દોમાં વર્ણવી શકાય-સ્પર્શને કાગળ પર ઉતારી શકાય તો પ્રેમની વ્યાખ્યા થઈ શકે. આજના દિવસે પ્રેમીઓ ગુલાબના ફૂલથી માંડીને ડાયમંડ-પ્લેટિનમ રિંગની સોગાદ એકમેકને આપી પ્રેમ વ્યક્ત કરશે. પરંતુ એવા પણ પ્રેમીઓ છે જેમણે પોતાની કિડની દાન કરીને પોતાના જીવનસાથીને નવજીવન આપ્યું છે. ગુજરાતમાં 5 વર્ષ દરમિયાન જ જીવનસાથીએ એકમેકને કિડની દાન આપીને 354 પ્રેરણાત્મક જ નહીં ‘પ્રેમાત્મક’ કિસ્સા નોંધાયા છે.
પતિમાં કિડની ડોનેશન આપવાના પ્રમાણમાં વધારો
સિવિલ મેડિસિટીમાં આવેલી ઈન્સ્ટિટ્યુટ ઓફ કિડની ડિસીઝ એન્ડ રિસર્ચ સેન્ટર (આઇકેડીઆરસી)માં પાંચ વર્ષમાં દપંતીઓ દ્વારા કિડની ડોનેટ કરવામાં 306 પત્ની અને 48 પતિનો સમાવેશ થાય છે. જોકે, હવે પતિમાં પણ કિડની ડોનેશન આપવાના પ્રમાણમાં વધારો થઈ રહ્યો છે. વર્ષ 2024માં 9 જ્યારે વર્ષ 2025માં 15 પતિ દ્વારા તેમના પત્નીને કિડની આપીને નવજીવન આપવામાં આવ્યું હતું.
ગુજરાતમાં કિડની ડોનેશન કરનારામાં પત્ની, માતા, દીકરીઓનું પ્રમાણ સૌથી વધારે છે. ઘણાં કિસ્સામાં પતિ-પત્નીનું બ્લડ ગ્રૂપ સમાન ન હોય તો તેના માટે સ્વેપ ટ્રાન્સપ્લાન્ટની પણ વ્યવસ્થા છે. આ અંગે ઈન્સ્ટિટ્યુટ ઓફ કિડની ડિસિઝ એન્ડ રીસર્ચ સેન્ટરના ડિરેક્ટર ડો. પ્રાંજલ મોદીએ જણાવ્યું કે, સાચા પ્રેમનો એકમાત્ર ધ્યેય એ હોય કે પોતાને ભલે પીડાને સામનો કરવો પડે પણ પોતાના પોતાના પ્રેમી કે પ્રેમિકાના ચહેરા પરનું સ્મિત કરમાવવું જોઇએ નહીં.
ગુજરાતમાં એવા પણ પતિ-પત્નીઓ છે જેમણે દરેક વિકટ સ્થિતિમાં ઢાલની જેમ રક્ષણ આપીને ખરા અર્થમાં જીવનસાથીની ભૂમિકા સાર્થક કરી છે. રક્તદાનની જેમ અંગદાન પણ મહાદાન છે. વેલેન્ટાઇન્સ ડેના પ્રેમી કે પ્રેમિકા એકમેકને ગુલાબ આપશે તો તે બે કલાકમાં કરમાઇ જશે. પરંતુ જીવનસાથીને અપાયેલું કિડનીનું દાન તેને નવું જીવન આપે છે. પીડા, દુઃખની ઘડીમાં સાથ આપે તેનું જ નામ આખરે સાચો પ્રેમ છે.
