5 ડિવિઝનમાં 9 દિવસમાં રૂ. 10 કરોડના બાકી વીજબીલની વસૂલાત | Rs 10 crore of outstanding electricity bills recovered in 9 days in 5 divisions
– ભાવનગર પીજીવીસીએલની સર્કલ ડિસકનેક્શન ડ્રાઈવ
– 2757 ટીમો બનાવી વીજબીલ નહી ભરનારા 1019 ગ્રાહકોના વીજ કનેક્શન કટ કરાયા
ભાવનગર : પીજીવીસીએલ ભાવનગર વર્તૂળ કચેરીના પાંચેય ડિવિઝનમાં તા.૧થી ૯ દરમિયાન સર્કલ ડિસકનેક્શન ડ્રાઈવ હાથ ધરવામાં આવી હતી. નવ દિવસ દરમિયાન પીજીવીસીએલની ૨૭૫૭ ટીમો દ્વારા રૂ.૧૦ કરોડથી વધારેના બાકી વીજબીલની વસૂલાત કરવામાં આવી છે. જ્યારે કુલ રૂ.૧.૦૨ કરોડનું વીજબીલ નહી ભરનારા ૧૦૧૯ ગ્રાહકોના વીજકનેક્શન કટ કરી દેવાયા છે.
પીજીવીસીએલ ભાવનગર વર્તૂળ કચેરી હેઠળની સીટી-૧, ૨, ગ્રામ્ય, મહુવા તથા તળાજા ડિવિઝનમાં ગત તા.૧ ફેબુ્રઆરીથી તા.૯ ફેબુ્રઆરી દરમિયાન સર્કલ ડિસકનેક્શન ડ્રાઈવ હાથ ધરવામાં આવી હતી. ભાવનગર પીજીવીસીએલ દ્વારા કુલ ૨૭૫૭ ટીમોનું ગઠન કરવામાં આવ્યું હતું. જેમાં રૂ.૧.૦૨ કરોડનું વીજબીલ નહી ભરનારા સીટી-૧માં ૨૧૦ કનેક્શન, સીટી-૨માં ૨૯૧ કનેક્શન, ગ્રામ્યમાં ૪૩, મહુવામાં ૨૦૧ અને પાલિતાણામાં ૨૭૪ કનેક્શન મળી કુલ ૧૦૧૯ ગ્રાહકોના વીજ કનેક્શન કાપી નાખવામાં આવ્યા હતા. જ્યારે લાંબા સમયથી વીજબીલ નહી ભરનારા ૩૦,૯૧૩ ગ્રાહકો પાસે બાકી વીજબીલ પેટેના કુલ રૂ.૧૦.૬૫ કરોડની પીજીવીસીએલની ટીમ દ્વારા સ્થળ પર વસૂલાત કરવામાં આવી હતી. નાણાંકીય વર્ષ પૂર્ણ થાય તે પહેલા લાંબા સમયથી બાકી અને નિયમિત વીજ બીલ નહી ભરનારા ગ્રાહકો પાસે કડકહાથે ઉઘરાણી કરવા પીજીવીસીએલ દ્વારા ડિસકનેક્શન ડ્રાઈવ હાથ ધરવામાં આવી છે અને આગામી દિવસોમાં લાંબા સમયથી બાકી અને નિયમિત વીજબીલ નહી ભરનારા ગ્રાહકો સામે કાર્યવાહી હાથ ધરવામાં આવશે.
