જિલ્લામાં ધોળા દિવસે ધાડ : તળાજાના પસવી નજીક કારમાં તોડફોડ કરી રૂ. 3 લાખની લૂંટ | Daytime raid in the district: Car vandalized near Talaja Pasvi Rs 3 lakh looted
– વેરાવળથી અમદાવાદ તરફ જઈ રહેલી કાર પર અજાણ્યા શખ્સોએ હુમલો કર્યો હતો
– મર્સિડિઝ કાર અન્ય કારના દરવાજા સાથે અથડાતા સાત-આઠ શખ્સોએ તોડફોડ કરી ડ્રાઈવરને માર માર્યો
ભાવનગર : શહેર અને જિલ્લામાં કાયદો વ્યવસ્થાની સ્થિતિ દિનપ્રતિદિન કથળી રહી હોય તેમ તળાજાના પસવી ગામ પાસે વેરાવળથી અમદાવાદ તરફ જઈ રહેલી મર્સિડિઝ કારમાં અજાણ્યા સાત-આઠ શખ્સોએ તોડફોડ કરી ધોળા દિવસે રૂ.૩ લાખની લૂંટ ચલાવી ડ્રાઈવરને માર માર્યો હતો. મર્સિડિઝ કાર અન્ય કારના દરવાજા સાથે અથડાતા માથાકૂટ સર્જાઈ હતી. આ મામલે દાઠા પોલીસ મથકમાં ગુનો નોંધાયો છે.
વેરાવળ તાલુકાના બાદલપર ગામમાં રહેતા હિતેષભાઈ જેસાભાઈ સોલંકી ગતરોજ તેમના શેઠ વીજુભાઈ બારડની જીજે-૧૮-ઈઈ-૯૮૫૩ નંબરની મર્સિડિઝ કાર લઈને બંસીબેન બારડ તથા બાળકોને લઈને અમદાવાદ ખાતે જઈ રહ્યાં હતા અને તેમની સાથે અન્ય બે કારમાં તેમના શેઠનો પરિવાર આગળ જતો હતો. ગતરોજ સાંજના પાંચ કલાકના અરસામાં તળાજા તાલુકાના પસવી ગામ પાસે કોદિયા ગામના રોડના ક્રોસિંગ નજીક પહોંચતા એક ટ્રેક્ટર ક્રોસિંગ થવા નિકળતા તેમણે તેમની કાર સાઈડમાંથી કાઢવા જતાં રોડની સાઈડમાં જાનની પાંચ-છ ગાડીઓ ઉભી હતી. તેમાંથી એક ગાડીનો દરવાજો અંદર બેસેલા કોઈએ અચાનક ખોલતા તેમના દરવાજા સાથે કાર અથડાઈ હતી. આ દરમિયાન આ કારમાંથી સાત-આઠ માણસો લાકડાના ધોકા તથા પાઈપ લઈને આવી કારમાં તોડફોડ કરી હતી અને તેમના માથામાં લોખંડના સળીયો માર્યો હતો અને ત્યાંથી પસાર થતાં કોઈ રાહદારીએ તેમને વધુ માર મારતા છોડાવ્યા હતા. આ દરમિયાન અજાણ્યા શખ્સો કારની ડીકીમાં રાખેલી બેગમાંથી સોનાના ઘરેણાં અને રોકડ મળી કુલ રૂ. ૩ લાખના મત્તાની લૂંટ કરી નાસી ગયા હતા. આ અંગે કારના ડ્રાઈવર હિતેષભાઈ જેસાભાઈ સોલંકીએ દાઠા પોલીસ મથકમાં અજાણ્યા શખ્સો સામે ફરિયાદ નોંધાવતા પોલીસે લૂંટ અને મારામારી સહિતની કલમો હેઠળ ગુનો નોંધી આગળની તપાસ હાથ ધરી છે.
તાલાલાના ધારાસભ્યના ભત્રીજાની કાર હતી
તળાજાના પસવી ગામ પાસે વીજુભાઈ બારડની મર્સિડિઝ કારમાં તોડફોડ અને લૂંટ થઈ હતી. મળતી વિગતો પ્રમાણે વીજુભાઈ બારડ તાલાલાના ધારાસભ્યના ભત્રીજા છે અને કારમાં ધારાસભ્યના પુત્રવધુ અને બાળકો સવાર હતા. જોકે તેમને કોઈ ઈજા પહોંચી નહોતી.
