ભાવનગર: ચાલતી ટ્રેને ઉતરવા જતી યુવતી ઢસડાઈ, પોઇન્ટ્સમેને બચાવ્યો જીવ, ઘટના CCTVમાં કેદ | bhavnagar sihor railway station viral video train accident cctv pointsman saves girl
Sihor Railway Viral Video: આવી તો કેવી ઉતાવળ કે જીવ પર આવી બને! વાત છે ભાવનગરના શિહોર રેલવે સ્ટેશનની, જ્યાં એક યુવતીએ ચાલુ ટ્રેનમાંથી ઊતરવાની કોશિશ કરતાં તેનું સંતુલન બગડી જાય છે. નસીબ હતું તો બાજુમાં ઉભેલા પોઇન્ટમેને સમયસુચકતાથી પકડી લીધી, નહીંતર પ્લેટ્ફોર્મ ટ્રેક અને રેલવે વચ્ચે ચગદાઈ જાત!
એ એ પડી..
ઉતાવળો સાત આંટા વધુ ફરે, આ સાંભળેલી કહેવત આજે સાચી ઠરી છે. 8 ફેબ્રુઆરીએ ભાવનગર રેલવે ડિવિઝન હેઠળ આવતા શિહોર રેલવે સ્ટેશન પર સવારે બોટાદ થી ભાવનગર તરફ આવી રહેલી ટ્રેન નંબર 59229 બોટાદ-ભાવનગર પેસેન્જર ટ્રેન પ્લેટફોર્મ પર ઊભી રહેવા ધીમે ગતિએ ચાલતી હતી. તે દરમિયાન એક યુવતી ઉતાવળમાં ચાલુ ટ્રેનમાંથી નીચે ઉતરવા જતાં સંતુલન ગુમાવી દે છે. નીચે પછડાઈ જાય છે જે ઘટનાના સીસીટીવી ફૂટેજ હાલ સામે આવ્યા છે. જુઓ VIDEO
યુવતીને પોઈન્ટમેને બચાવી લીધી
જો કે યુવતીનું ભાગ્ય સારું હતું કે તે જે જગ્યાએ નીચે ઊતરે છે ત્યાં નજીકમાં જ રાજકુમાર નામનો એક પોઇન્ટમેન ઊભો હતો. તેને સતર્કતા દાખવી તાત્કાલિક દોડી યુવતીને બચાવી લીધી અને તેને ઊભી કરી ફરી ચાલુ ટ્રેનમાંથી ન ઉતરવા માટે સૂચન કર્યું.
રેલવેએ આપી સલાહ
સતત મુસાફરો પ્લેટફોર્મ પર ચાલુ ટ્રેને ઉતરી જતાં હોય તેવી ઘટનાઓ સામે આવતા રેલવે પણ સલાહ આપી છે કે ચાલતી ટ્રેને ચડવું કે ઉતરવું બંને જોખમી છે. ટ્રેન ઊભી હોય ત્યારે જ તેમાં ચડ ઉતર કરવી જોઈએ. મહત્વનું છે કે ઘણા એવા કિસ્સાઓ છે કે ઉતાવળમાં ચાલુ ટ્રેનમાંથી મુસાફર ઉતર્યા હોયને મોતને ભેટયા હોય, સફરમાં સાવધાની જરૂરી છે જેથી આવી ઘટનાઓ ટાળી શકાય!
