બનાસકાંઠાના ગોઢ ગામના ‘ઓનર કિલિંગ’ કેસમાં 9 આરોપીને આજીવન કેદ, ડીસા કોર્ટનો ઐતિહાસિક ચુકાદો | Deesa Court Life Imprisonment to 9 in Honor Killing Case

Dantiwada Honor Killing Case : બનાસકાંઠાના દાંતીવાડા પંથકમાં એક વર્ષ અગાઉ પ્રેમલગ્નની અદાવતમાં આચરાયેલા ક્રૂર હત્યાકાંડમાં ડીસા કોર્ટે ઐતિહાસિક અને કઠોર ચુકાદો સંભળાવ્યો છે. ‘ઓનર કિલિંગ’ના આ કિસ્સામાં કોર્ટે સ્પષ્ટ કર્યું છે કે પ્રેમલગ્ન એ વ્યક્તિગત અધિકાર છે અને તેના નામે કાયદો હાથમાં લેનારાઓને સમાજમાં કોઈ સ્થાન નથી.

શું હતો આખો મામલો?

ઘટના એક વર્ષ અગાઉ દાંતીવાડાના ગોઢ ગામમાં બની હતી. અહીંના મહેશકુમાર ઠાકોરે પરિવારની મરજી વિરુદ્ધ પ્રેમલગ્ન કર્યા હતા. દીકરીના પરિવારને આ વાત મંજૂર નહોતી, જેના કારણે તેમણે વેર વાળવાનું કાવતરું ઘડ્યું. શનિવારે ડીસાની એડિશનલ સેસન્સ કોર્ટમાં સરકારી વકીલ વિપુલ બી. કંસારાની ધારદાર દલીલો બાદ ન્યાયાધીશ શિલ્પાબેન કનાબારે આ ચુકાદો આપ્યો હતો. ન્યાયાધીશે અવલોકન કર્યું કે, પ્રેમલગ્ન જેવા મુદ્દે આખા પરિવારને ખતમ કરવાનો પ્રયાસ કરવો એ સામાજિક રીતે ઘાતક છે.

હુમલાની ભયાનકતા

આરોપીઓ પૂર્વ આયોજિત ષડયંત્ર મુજબ હથિયારો સાથે પિકઅપ ડાલામાં સવાર થઈને મહેશના ઘરે ત્રાટક્યા હતા. ધારિયા, પાઈપો અને લાકડીઓથી મહેશ પર એટલો ભયાનક હુમલો કર્યો કે તેનું ઘટનાસ્થળે જ મોત નીપજ્યું. પુત્રને બચાવવા વચ્ચે પડેલા માતા સૂર્યાબેન અને પિતા સાબાજીને પણ આ ટોળાએ દયા વગર ફટકાર્યા હતા.

સજા પામેલા 9 આરોપીઓની યાદી

અદાલતે જે 9 શખ્સોને દોષિત જાહેર કરી જેલના સળિયા પાછળ ધકેલ્યા છે તેમના નામ નીચે મુજબ છે:

જેઠાભાઈ દલાભાઈ ઠાકોર

કપૂરજી સરદારજી ઠાકોર

ભેમાભાઈ નાગરભાઈ

ભરતજી કેવલજી ઠાકોર

કાનજી બચુજી ઠાકોર

ભેરાજી કેવલજી ઠાકોર

નાગરજી વિરચંદજી ઠાકોર

ભૂતાજી રવજી ઠાકોર

દશરથજી હરિજી ઠાકોર

આ ચુકાદો સમાજના એવા તત્વો માટે ચેતવણી સમાન છે જેઓ સામાજિક પ્રતિષ્ઠાના નામે માનવ અધિકારોનું હનન કરે છે. ડીસા કોર્ટના આ નિર્ણયથી પીડિત પરિવારને ન્યાય મળ્યો છે અને અસામાજિક તત્વોમાં કાયદાનો ડર પેદા થશે.