ભૂલા પડતા વન્યજીવો શહેરમાં ઘુસી આવે છે: હરણી વિસ્તારમાં શાહુડી દેખાઈ | Porcupine spotted in Harni area of Vadodara
વડોદરા શહેરના છેવાડાના વિસ્તારોનો વડોદરામાં સમાવેશ થઈ જવાથી વન વગડાના વન્ય જીવો આસપાસના અન્ય વિસ્તારોમાંથી કેટલીય વાર શહેરી વિસ્તારમાં ભૂલા પડી જવાના બનાવો અવારનવાર બનતા રહ્યા છે. આવા જ એક બનાવમાં વન્ય જીવ શાહુડી રોડ-રસ્તા પરથી સરેઆમ દોડતી જોવા મળી હોવાનો વિડીયો વાયરલ થયો હતો.
શહેરી વિસ્તારમાં હરણી ખાતે આવેલા મોત નાથ મહાદેવ પાસેના જાહેર રોડ પરથી વન્ય જીવ શાહુડી દોડતી જણાતા એક વાહન ચાલકને નજરે પડી હતી. આવા વન્યજીવને શહેરી વિસ્તારમાં જોતા જ અચંબિત થયેલા વાહન ચાલકે તત્કાળ વાહનને રોકી પોતાના વાહનને તત્કાળ રોકીને વન્યજીવને પોતાના મોબાઈલના કેમેરામાં કેદ કરી લીધી હતી. જોકે વાહન ચાલકને વન્ય જીવે જોતા જ જીવ બચાવીને દોડીને નજીકના ઝાડી ઝાંખરામાં દોડી ગઈ હતી. આ અંગે સ્થાનિક લોકોએ સાવચેત રહેવું જરૂરી છે.
ઉલ્લેખનીય છે કે આવી જ રીતે ન્યુ સમા રોડ- અભિલાષા વિસ્તારમાં પણ અન્ય વન્ય જીવ શિયાળ કેનાલ વિસ્તારમાંથી ભૂલુ પડીને રહેણાક વિસ્તારમાં એપાર્ટમેન્ટના પહેલા માળે પહોંચી ગયું હતું. પરિણામે સ્થાનિકોમાં ગભરાટ ફેલાયો હતો. આ વન્ય જીવ શિયાળને વન વિભાગ દ્વારા ત્રણથી ચાર કલાકની ભારે જહેમત બાદ પકડી લેવાયું હતું.
