સુરત: શનિવારે મોડી સાંજે ICCCમાં અધિકારીઓ સાથે બજેટની રિવ્યુ બેઠક થઈ | Surat: Budget review meeting with officials held at ICCC late on Saturday evening
સુરત પાલિકાનું ડ્રાફ્ટ બજેટ જાહેર થાય તે પહેલાં જ મ્યુનિ. કમિશનરની બદલી થઈ ગઈ હતી. નવા આવેલા મ્યુનિ. કમિશ્નરે પાલિકાનું બજેટ વહેલું રજૂ થાય તે માટે કવાયત શરુ કરી દીધી છે. ગઈકાલ શનિવારે પાલિકાના અધિકારીઓ- વિભાગીય વડા સાથે ICCCમાં બજેટની રિવ્યુ બેઠક કરી હતી જેમાં બજેટ ને આખરી ઓપ આપવામાં આવ્યો હતો. આગામી એકાદ બે દિવસમાં મ્યુનિ. કમિશનર બજેટ જાહેર કરશે અને તેનું કદ બીજી વખત 10 હજાર કરોડ ને પાર કરે તેવી શક્યતા પુરેપુરી છે. આ ઉપરાંત આગામી વર્ષ પાલિકાની ચૂંટણીનું વર્ષ હોવાથી વિવિધ પ્રકારના વેરા માં કોઈ વધારો થા તેવી શક્યતા નહિવત જોવા મળી રહી છે.
સુરત પાલિકાનું ડ્રાફ્ટ બજેટ જાહેર થવા માટે કાઉન્ટ ડાઉન થઈ રહ્યું હતું તેમાં મ્યુનિ. કમિશ્નરને થયેલી બદલી ના કારણે બજેટ જાહેર કરવામાં થોડો વિલંબ થયો છે. મ્યુનિ. કમિશનર તરીકે ભાર સંભાળ્યાના પહેલા જ દિવસે એમ. નાગરાજને અધિકારીઓ સાથે બજેટ બેઠક શરુ કરી દીધી હતી. ગઈકાલ શનિવારે પણ મોડી સાંજે સાત વાગ્યે વેસુ ખાતે આવેલી ICCC માં ઝોનલ ચીફ, વિભાગીય વડા સાથે બજેટની રિવ્યુ બેઠક કરી બજેટને આખરી ઓપ આપ્યો હતો.
સુરત પાલિકાના વર્ષ 2025-26 નું રિવાઈઝ બજેટ અને વર્ષ 2026-27 ના ડ્રાફ્ટ બજેટ માટે નવા નિમાયેલા મ્યુનિ. કમિશ્નર એમ. નાગરાજન નિમણુંકના પહેલા જ દિવસથી અધિકારીઓ સાથે બેઠ કરી રહ્યાં છે. શનિવારે સુરતમાં મુખ્યમંત્રી પાલિકાના વિવિધ કાર્યકર્મના લોકાર્પણ ખાત મુર્હુત બાદ મ્યુનિ. કમિશ્નરે બજેટ રિવ્યુ બેઠક કરી હતી જેના કારણે આગામી એક બે દિવસમાં બજેટ જાહેર કરવામાં આવે તેવી ગણતરી થઈ રહી છે.
એક તરફ પાલિકાની ચુંટણીનું કાઉન્ટ ડાઉન થઈ રહ્યું છે અને બીજી તરફ બજેટ જાહેર થશે તેના કારણે વેરામાં વધારો થાય તેવી શક્યતા નહીવત છે આ ઉપરાંત કેટલાક પ્રોજેક્ટ ડ્રાફ્ટ બજેટમાં નહી પરંતુ સ્થાયી સમિતિમાં જાહેર કરવામાં આવે તેવી પણ શક્યતા વ્યક્ત થઈ રહી છે. પાલિકા કમિશ્નરે પહેલી બેઠકમાં મોટા પ્રોજેક્ટની જગ્યાએ સાકાર થાય તેવા વાસ્તવિક પ્રોજેક્ટ મુકવા માટે તાકીદ કરી દીધી હતી. જોકે, ગત વર્ષની જેમ આ વર્ષે પણ બજેટનું કદ 10 હજાર કરોડને પાર કરી જાય તેવી શક્યતા યથાવત છે.
ચાલુ નાણાકીય વર્ષમાં કેપીટલ કામો માટે 4700 કરોડની જોગવાઈ કરવામાં આવી હતી પરંતુ હજી સુધી કેપીટલ કામો માત્ર 2200 કરોડના જ થયા છે અને હવે કેપીટલ કામો 3500 કરોડના થાય તે માટે મરણિયા પ્રયાસ થઈ રહ્યા છે. જેના કારણે રિવાઈઝ બજેટમાં કેપીટલ કામોમાં એક હજાર કરોડનો ઘટાડો કરવામાં આવશે તે નક્કી છે.
