પશ્ચિમી દેશોના ઝઘડામાં ચીન-રશિયાને ફાયદો, EUએ અમેરિકા-યુરોપને આપી કડક ચેતવણી | EU warns Trump’s tariff war with Europe benefits China Russia and weakens the West
EU warns Trump : યુરોપિયન યુનિયન (EU)ના ટોચના રાજદ્વારી અને યુરોપિયન કમિશનના ઉપાધ્યક્ષ કાજા કૈલાસે અમેરિકા અને યુરોપ વચ્ચે વધી રહેલા મતભેદોને લઈને કડક ચેતવણી આપી છે. તેમણે સ્પષ્ટપણે કહ્યું છે કે સહયોગી દેશો વચ્ચેની આંતરિક ફૂટનો સૌથી વધુ ફાયદો ચીન અને રશિયાને થઈ રહ્યો છે.
‘ચીન અને રશિયાને થઈ રહ્યો છે ફાયદો’
કાજા કૈલાસે સોશિયલ મીડિયા પ્લેટફોર્મ X પર પોસ્ટ કરીને લખ્યું કે વર્તમાન પરિસ્થિતિમાં ચીન અને રશિયા ‘મૌજ કરી રહ્યા હશે’, કારણ કે સહયોગી દેશો વચ્ચેના આંતરિક મતભેદો સીધા તેમના હિતમાં જઈ રહ્યા છે. તેમણે ઈશારામાં કહ્યું કે જો પશ્ચિમી દેશોની એકતા નબળી પડશે તો તેનો સીધો ફાયદો એ શક્તિઓને મળશે, જે વૈશ્વિક વ્યવસ્થાને પડકારી રહી છે.
‘ગ્રીનલેન્ડનો મુદ્દો NATOમાં ઉકેલો’
કાજા કૈલાસે ગ્રીનલેન્ડની સુરક્ષાને લઈને ચાલી રહેલી તીવ્ર ચર્ચા પર પણ મહત્વનું નિવેદન આપ્યું. તેમણે કહ્યું કે જો ગ્રીનલેન્ડની સુરક્ષાને કોઈ ખતરો છે, તો આ મુદ્દાને NATOના માળખામાં રહીને જ ઉકેલી શકાય છે. તેમનું કહેવું હતું કે અલગ-અલગ મંચો પર નિવેદનબાજી કરવા કે વિવાદ વધારવાને બદલે સહયોગી દેશોએ NATO ફ્રેમવર્કમાં જ સમાધાન શોધવું જોઈએ.
‘ટેરિફ યુદ્ધથી બંનેને નુકસાન’
EUના આ ટોચના નેતાએ ‘ટેરિફ વોર’ને લઈને પણ અમેરિકાને ઈશારામાં ચેતવણી આપી. કાજા કૈલાસે કહ્યું કે ટેરિફ લગાવવાથી યુરોપ અને અમેરિકા બંને ગરીબ થશે, જેનાથી સહિયારી સમૃદ્ધિ નબળી પડશે અને ટ્રાન્સ-એટલાન્ટિક સંબંધોમાં તિરાડ વધુ ઊંડી થશે. તેમણે સ્પષ્ટ શબ્દોમાં કહ્યું કે વેપારિક ટકરાવ સહયોગી દેશોની આર્થિક તાકાતને જ નબળી પાડે છે, જેનો ફાયદો વિરોધી શક્તિઓ ઉઠાવે છે.
‘મુખ્ય લક્ષ્ય યુક્રેન, ધ્યાન ભટકવું ન જોઈએ’
કાજા કૈલાસે સૌથી મહત્વની વાત યુક્રેન યુદ્ધને લઈને કહી. તેમણે કહ્યું કે યુરોપ અને અમેરિકા વચ્ચે કોઈપણ પ્રકારનો વિવાદ રશિયા વિરુદ્ધ ચાલી રહેલી વ્યૂહાત્મક લડાઈથી ધ્યાન ભટકાવવો ન જોઈએ. તેમણે ભારપૂર્વક કહ્યું કે, આપણું મુખ્ય લક્ષ્ય રશિયાના યુક્રેન પરના યુદ્ધને સમાપ્ત કરવામાં મદદ કરવાનું છે અને આંતરિક મતભેદો આ લક્ષ્યમાં અવરોધ ન બનવા જોઈએ.
EUએ શા માટે નિવેદન આપવું પડ્યું?
ખરેખર, અમેરિકી રાષ્ટ્રપતિ ડોનાલ્ડ ટ્રમ્પે ગ્રીનલેન્ડ મુદ્દે યુરોપના ઘણા સહયોગી દેશો પર સીધો આર્થિક હુમલો કરી દીધો છે. ટ્રમ્પે ડેનમાર્ક, ફ્રાન્સ, જર્મની, બ્રિટન સહિત અનેક યુરોપિયન દેશો પર 10% ટેરિફ લગાવવાની જાહેરાત કરી છે, જેને ભવિષ્યમાં 25% સુધી વધારવાની ધમકી પણ આપવામાં આવી છે. ટ્રમ્પ ગ્રીનલેન્ડને લઈને રાષ્ટ્રીય અને વૈશ્વિક સુરક્ષાનો તર્ક આપી રહ્યા છે અને સ્પષ્ટ કરી ચૂક્યા છે કે જો ડીલ નહીં થાય તો ટેરિફ ચાલુ રહેશે. આનાથી અમેરિકા-યુરોપ સંબંધોમાં ગંભીર તિરાડ, NATO સહયોગીઓમાં તણાવ અને પશ્ચિમી એકતા નબળી પડવાનો ખતરો ઉભો થયો છે.
