રાઉત-ફડણવીસ સામ સામે : ’10 મિનિટમાં મુંબઈ બંધ’ની ધમકી પર CM બોલ્યા- ‘શિંદેને તો રોકી ન શક્યા’ | Raut Fadnavis face to face: CM speaks on threat of ‘Mumbai Bandh in 10 minutes’
Sanjay raut and Devendra Fadanvis News : 15 જાન્યુઆરીએ યોજાનારી BMC (બૃહન્મુંબઈ મહાનગરપાલિકા) ચૂંટણીને લઈને મહારાષ્ટ્રનું રાજકીય વાતાવરણ ગરમાયું છે. શિવસેના(UBT)ના રાજ્યસભા સાંસદ સંજય રાઉતના ‘ 10 મિનિટમાં મુંબઈ બંધ કરાવવાના’ દાવા પર મુખ્યમંત્રી દેવેન્દ્ર ફડણવીસે આકરો પલટવાર કર્યો છે. તેમણે રાઉતની વાતને ‘શિયાળની ધમકી’ ગણાવીને કહ્યું કે સ્વર્ગસ્થ બાળાસાહેબ ઠાકરેના સમયમાં આવું શક્ય હતું, પરંતુ હવે એવું નથી.
સંજય રાઉતે શું કહ્યું હતું
એક ટીવી કાર્યક્રમમાં સંજય રાઉતે કહ્યું હતું, “અમારું સંગઠન મજબૂત છે. આજે પણ અમે 10 મિનિટમાં મુંબઈ બંધ કરાવી શકીએ છીએ… આને ધમકી જ સમજી લો.” ખાસ વાત એ છે કે, થોડા સમય પછી એ જ ચેનલના કાર્યક્રમમાં મુખ્યમંત્રી દેવેન્દ્ર ફડણવીસ પણ પહોંચ્યા હતા, જ્યાં તેમણે રાઉતના આ નિવેદન પર પ્રતિક્રિયા આપી. તેમણે કહ્યું, “જુઓ, પહેલી વાત તો એ કે, શિયાળની ધમકીઓથી ડરનારા લોકો અમે નથી. બીજું, જો તમારી તાકાત એટલી જ હતી તો તમે પડકાર ફેંક્યો હતો કે જે સમયે એકનાથ શિંદે મુંબઈમાં આવશે, અમે તેમને પ્રવેશ નહીં કરવા દઈએ. મુંબઈમાં પગ નહીં મૂકી શકે.”
તમે કંઈ બગાડી ના શક્યા : ફડણવીસ
ફડણવીસે વધુમાં કહ્યું, “એકનાથ શિંદે મુંબઈમાં આવ્યા. 50 ધારાસભ્યો સાથે આવ્યા. આ જ મુંબઈના રસ્તેથી અમે રાજભવન ગયા અને સરકાર સ્થાપિત કરી. મુંબઈ બંધ કરાવવાનું તો છોડો, આ લોકો પોતાના ઘરની આસપાસ પણ બંધ ન કરાવી શક્યા. આ બધી માત્ર બોલવાની વાતો છે. જુઓ, જે સમયે બાળાસાહેબ ઠાકરે હતા, તે સમયની શિવસેનાની તાકાત હતી કે બાળાસાહેબના એક ઇશારા પર બે કલાકમાં મુંબઈ બંધ થઈ શકતું હતું. હવે એમનામાં કોઈનામાં દમ નથી.”
BMC ચૂંટણીમાં રાજ અને ઉદ્ધવ ઠાકરેનું ગઠબંધન
ખાસ વાત એ છે કે BMC ચૂંટણી માટે ઠાકરે બંધુઓ, રાજ અને ઉદ્ધવ, એ ગઠબંધન કર્યું છે. આ અંગે સંજય રાઉતે કહ્યું, “ઉદ્ધવ ઠાકરે અને રાજ ઠાકરે ભાઈઓ છે. તેમની માતાઓ બહેનો છે. આ પરિવારનો મામલો છે. હું બંનેનો મિત્ર છું. જો તેમના એક થવામાં મારી કોઈ પણ ભૂમિકા હોય, તો હું મારી જાતને ભાગ્યશાળી માનીશ.”
