150 વિમાન, 30 મિનિટમાં માદુરોની ધરપકડ, વેનેઝુએલામાં અમેરિકાના ઓપરેશનની જાણો સંપૂર્ણ માહિતી | Know the complete details of the US operation in Venezuela
US operations in Venezuela : અમેરિકા દ્વારા ગુપ્ત સૈન્ય અભિયાન બાદ વેનેઝુએલાના પ્રમુખ નિકોલસ માદુરોની ધરપકડ કરવામાં આવી. અમેરિકાએ આ મિશનને ‘ઓપરેશન એબ્સોલ્યુટ રિઝોલ્વ’ નામ આપ્યું છે. અમેરિકાના રાષ્ટ્રપ્રમુખ આ મામલે પુષ્ટી કરતાં કહ્યું કે, ‘હવે વેનેઝુએલામાં સત્તા પરિવર્તન સુધી અમેરિકા દેશનું નિયંત્રણ સંભાળશે.’ અમેરિકન જોઈન્ટ ચીફ ઓફ સ્ટાફના ચેરમેન જનરલ ડેન કેન અનુસાર, આ મિશનને 2 જાન્યુઆરીની રાત્રે અંજામ આપવામાં આવ્યું હતું. આમ 150 વિમાન, 30 મિનિટમાં માદુરોની ધરપકડ સહિતની વિવિધ બાબતને લઈને વેનેઝુએલામાં અમેરિકાના ઓપરેશનની જાણો સંપૂર્ણ માહિતી.
ઓપરેશનમાં 150 થી વધુ વિમાનો સામેલ
આ મિશનમાં F-22, F-35, F-18 ફાઈટર પ્લેન, B- 1 બોમ્બર્સ અને ડ્રોન સહિત 150 થી વધુ વિમાનો સામેલ હતા. ટ્રમ્પે રાતના 10:46 વાગ્યા (ઈસ્ટર્ન ટાઈમ) મિશનને લીલી ઝંડી આપી હતી. આ પછી રાત્રે 1:01 વાગ્યે (કારાકસ સમય મુજબ 2:01 વાગ્યે), યુએસ ફોર્સ માદુરોના કમ્પાઉન્ડમાં ઉતરી હતી. માદુરો કિલ્લા જેવા એક સુરક્ષિત મહેલમાં હતું. ટ્રમ્પે કહ્યું કે, ‘યુએસ સૈનિકોએ આ મહેલની પ્રતિકૃતિ પર મહિનાઓ સુધી પ્રેક્ટિસ કરી હતી.’
30 મિનિટમાં મિશન પૂરું
અમેરિકાના રાષ્ટ્રપ્રમુખે માર-એ-લાગોથી આપેલા નિવેદનમાં કહ્યું કે, ‘જ્યારે ઘટનાને અંજામ આપવમાં આવ્યું ત્યારે કારાકસની લાઈટ બંધ હતી. આ એક ડાર્ક અને ઘાતક મિશન હતું. સૈનિકો પાસે ભારી બ્લોટોર્ચ હતી, જેથી તેઓ સુરક્ષિત રૂમના દરવાજા કાપીને અંદર પ્રવેશી શકે. પરંતુ માદુરોને સુરક્ષિત રૂમ સુધી પહોંચવાનો મોકો મળ્યો ન હતો. 30 મિનિટથી પણ ઓછા સમયમાં માદુરોને પકડી લેવામાં આવ્યા હતા. આ દરમિયાન કારાકસમાં ઓછામાં ઓછા સાત મોટા વિસ્ફોટ સંભળાયા હતા.’
વેનેઝુએલા હવે અમેરિકાના નિયંત્રણમાં
ટ્રમ્પે સ્પષ્ટ કર્યું છે કે, વેનેઝુએલામાં એક સુરક્ષિત અને ઉચિત સત્તા હસ્તાંતરણ સુધી અમેરિકા દેશને ચલાવશે. જોકે, આ મામલે તેમણે કોંઈ નિશ્ચિત સમયસીમા જણાવી નથી. જ્યારે અમેરિકાના ન્યાય વિભાગે પુષ્ટિ કરી છે કે, માદુરો અને તેમની પત્ની સિલિયા ફ્લોર્સ પર નાર્કો-ટેરિઝમના ગંભીર આરોપ છે. જેને લઈને તેમના વિરૂદ્ધમાં અમેરિકામાં કેસ ચાલશે.
જનરલ કેને જણાવ્યું હતું કે, આ મિશનમાં કોઈપણ અમેરિકન સૈનિકનું મૃત્યું થયું નથી. જ્યારે વેનેઝુએલાના અધિકારીનો દાવો છે કે, આ હુમલામાં તેમના કેટલાક સૈનિકો અને નાગરિકોના મોત થયા છે. પરંતુ તેમને ચોક્કસ માહિતી જણાવી નથી.
ગુપ્તચર એજન્સીઓની માયાજાળ
આ મિશનની સફળતા CIA, NSA અને NGA જેવી ટોચની ગુપ્તચર એજન્સીઓ દ્વારા ચલાવવામાં આવી હતી. જનરલ કેને જણાવ્યું કે, આ કામગીરી દાયકાઓના અનુભવ અને આર્મી, નેવી અને એરફોર્સ વચ્ચેના અજોડ સંકલનનું પરિણામ છે. આમ, નિષ્ફળતા એ કોઈ વિકલ્પ નથી કારણ કે એક પણ ભૂલ સમગ્ર કામગીરીને જોખમમાં મૂકી શકે છે.
