સુરત: દીકરીના કબજા માટે પતિએ પત્ની પાસે માંગ્યા 20 લાખ રૂપિયા, ફરિયાદ દાખલ
સુરત: શહેરમાં એક વ્યક્તિએ તેની પત્ની પાસે દીકરીના કબજા માટે 20 લાખ રૂપિયા માંગ્યાની ફરિયાદ નોંધાઈ છે. સુરત ની યુવતીના હીરા વેપારી સાથે લગ્ન થયા હતા. જે બાદમાં હીરા વેપારી બેંગકોક સ્થાયી થયો હતો. લગ્ન બાદ બંનેને સંતાન તરીકે એક દીકરી અવતરી હતી. જોકે, દીકરી (Daughter)ના જન્મ બાદ મહિલાનો પતિ મહિલાના ચારિત્ર્ય પર શંકા રાખી તેને માર મારતો હતો. જે બાદમાં મહિલા કંટાળીને સુરત પોતાના પિયરમાં આવી ગઈ હતી. આ દરમિયાન પરિણીતાએ દીકરીનો કબજો સોંપવાની વાત કરતા પતિએ 20 લાખ રૂપિયાની માંગણી કરી હતી. આ મામલે મહિલાએ પતિ વિરુદ્ધ ફરિયાદ નોંધાવી છે.
બનાવની વિગતે વાત કરીએ તો સુરતમાં રહેતી એક યુવતીના લગ્ન પરિવારની સહમતિ સાથે મુંબઈ ખાતે હીરા કંપનીમાં નોકરી કરતા દિવ્યેશ મોરખીયા સાથે એપ્રિલ 2008માં થયા હતા. લગ્ન જીવનના એક વર્ષમાં પતિ દિવ્યેશને બેંગકોક ખાતે સારી નોકરી મળતા તે પરિવાર સાથે ત્યાં જતો રહ્યો હતો. જોકે, થોડા સમય બાદ પતિ દિવ્યેશે નોકરી છોડી પોતાનો હીરાનો વેપાર શરુ કર્યો હતો.
